Qozog‘istonning G‘arbiy Qozog‘iston viloyatida koronavirus bilan takroran kasallanish bo‘yicha birinchi holat qayd etildi. Bu haqda Tengrinews xabar berdi.
G‘arbiy Qozog‘iston viloyati sog‘liqni saqlash boshqarmasi rahbarining o‘rinbosari Gulnora Abdurahmonovaning ma’lum qilishicha, koronavirus bilan qayta kasallanish bo‘yicha dastlabki holat ayol kishida qayd etilgan.
Mazkur ayol pandemiya boshida — aprel oyida koronavirus bilan kasallangan. Ikkinchi marta esa kasallanish avgust oyida kuzatilgan. Ikki holatda ham bemor ayol statsionar sharoitda davolangan.
Qozog‘istonda koronavirus bilan kasallanish va COVID-19 belgilari bilan kuzatiladigan pnevmoniyaga chalinish holatlari soni har kuni ortib bormoqda. Kasallanish holatlari sonining ortishi birdaniga mamlakatning bir nechta viloyatida kuzatilmoqda, shaharlar va viloyatlar atrofida sanitar va blokpostlar o‘rnatilmoqda.
Avvalroq koronavirus tarqalishi munosabati bilan Qozog‘iston o‘z davlat chegarasini kesib o‘tish bo‘yicha cheklov choralarini kuchaytirishi haqida xabar berilgandi.
Eslatib o‘tamiz, oktabr oyi oxirida O‘zbekistonda Koronavirusga qarshi kurash shtabi a’zosi Nargiza Nurullayeva O‘zbekistonda COVID-19 bilan qayta kasallanish holatlari qayd etilayotganini ma’lum qilgan edi. Biroq Koronavirusga qarshi kurash shtabining boshqa a’zosi Sevara Ubaydullayeva bir haftadan keyin shtabga koronavirus bilan qayta kasallanish holati haqida ma’lumot kiritilmaganini aytdi.
Sentabr oyi oxirida O‘zbekistonning bosh sanitar inspektori va Koronavirusga qarshi kurashish shtabi a’zosi Nurmat Otabekov koronavirus infeksiyasi bilan qaytadan kasallanish masalasida aholi tomonidan berilayotgan savollarga javob qaytarib, “bu epidemik mavsumda COVID-19 bilan qayta kasallanish ehtimoli yo‘q”ligini aytgandi.
Izoh (0)