Niderlandiyada koronavirus sabab karantin choralari kuchaytirildi. Mamlakatda muzey, teatr, kazino, kinoteatr, ko‘ngilochar parklar va xizmat ko‘rsatish sohasidagi boshqa tashkilotlar yopildi. Hukumat koronavirusga qarshi kurash yo‘lida komendantlik soati va maktablarni yopish kabi to‘liq lokdaunga o‘tish ehtimolligini istisno etmagan, deb xabar beradi “Kommersant”.
Mamlakatda yangi cheklovlar 17-noyabrga qadar amalda bo‘ladi, shundan so‘ng Niderlandiyada oldingi cheklov rejimlariga qaytiladi. O‘rnatilgan cheklovlar ro‘yxati bilan hukumat sayti orqali to‘liq tanishish mumkin.
Shuningdek, Niderlandiya hukumati aholiga yanvar oyi o‘rtalariga qadar sayohatlarni rejalashtirmaslikni tavsiya qilgan. Mamlakatda ruxsat etilgan namoyish va yig‘ilishlardan tashqari jamoat tadbirlarni o‘tkazish taqiqlangan. Voyaga yetganlar ijtimoiy masofalanishga rioya qilgan holda sport bilan shug‘ullanishi mumkin. Do‘konlar soat 20:00 gacha ishlaydi va soat 20:00 dan 7:00 ga qadar alkogol mahsulotlari sotilmaydi.
Shveysariyaning Vo va Fribur kantonlari (kichik ma’muriy-territorial bo‘linma) koronavirus tarqalishi davom etayotgani sabab favqulodda holat rejimini e’lon qildi. Oldinroq bu kabi qarorni Jeneva, Yura va Nyoshatel kantonlari qabul qilgandi.
Fransuz tilida so‘zlashuvchi kantonlarda karantin noyabr oxiriga qadar amalga bo‘ladi. Bu davr oralig‘ida barcha restoran va barlar yopiladi. Vo kantonida do‘konlar, go‘zallik salonlari va maktablar xavfsizlik choralariga rioya qilgan holda ishlashni davom ettirishi mumkin. Friburda esa do‘konlar, sport markazlari, basseynlar, ko‘ngilochar maskanlar yopiladi.
Gruziya hukumati mamlakat aholisiga nafaqat binolar ichida, balki ko‘chalarda ham himoya niqobida yuzish majburiyatini qo‘ydi, deb xabar beradi “Korrespondent.net”. Ma’lum qilinishicha, niqobga oid qoidalarni buzgan shaxslar 6 dollar jarimaga tortilishi mumkin.
Bundan tashqari, butun mamlakat bo‘ylab restoranlar faoliyati cheklangan. Ular soat 22:00 dan so‘ng yopilishi kerak. Bunga qadar shu turdagi cheklovlar Tbilisi, Mesxete, Kutaisi va Batumida ham joriy etilgandi. Shuningdek, ko‘plab maktablar noyabr oxiriga qadar masofaviy ta’lim rejimini saqlab qoladi.
Vengriyada ham COVID-19’ga qarshi kurash doirasida butun mamlakat bo‘ylab yarim tundan soat 5:00 ga qadar komendantlik soati joriy etildi. Shuningdek, barlar va boshqa ko‘ngilochar maskanlar yopilmoqda. Ta’kidlanishicha, mamlakatdagi “alohida rejim” 4-noyabr yarim tundan kuchga kiradi.
Vengriya bosh vaziri Viktor Orbanning ta’kidlashicha, u parlamentdan cheklovlarni 90 kunga uzaytirishni so‘raydi.
Shu bilan birga, mamlakatda ta’lim muassasalari, do‘kon va restoranlar odatdagi rejimda ishlashni davom ettiradi. Madaniy va sport tadbirlari cheklangan odamlar ishtirokida o‘tkaziladi.
Avvalroq Norvegiya, Fransiya va Ukrainada karantin choralari kuchaytirilgani, Portugaliyada aholining mamlakat bo‘ylab harakatlanishini taqiqlab qo‘yilgani to‘g‘risida xabar berilgandi. Shuningdek, Avstriya qayta karantin joriy etgan, Angliyada esa dekabr boshigacha lokdaun e’lon qilingandi.
Izoh (0)