Argentinada koronavirus infeksiyasiga qarshi Rossiyaning “Sputnik V” vaksinasi bilan emlash bepul amalga oshiriladi. Mamlakat prezidenti vaksinani iloji boricha tezroq olib kelish bo‘yicha topshiriq bergan. Bu haqda prezident yordamchisi Sesiliya Nikkolini ma’lum qildi, deb yozmoqda “RIA Novosti”.
“Prezident vaksinani iloji boricha qisqa vaqtda qo‘lga kiritish yuzasidan barcha choralarni ko‘rish mas’uliyatini o‘z zimmasiga oldi”, – degan davlat rahbari yordamchisi El Destape radiosiga bergan intervyusida.
“Vaksina bepul bo‘ladi. “Sputnik V”ning narxi 19,9 AQSh dollari, lekin u hamma uchun bepul bo‘ladi. Mamlakat aholisi tekinga emlanishi mumkin”, – deya qo‘shimcha qilgan Nikkolini.
Shuningdek, u koronavirusga qarshi vaksinatsiya qilish Argentina tarixidagi eng katta kampaniyalarda biri bo‘lishini qayd etgan. Mamlakat faqat Rossiya bilan vaksina sotib olish bo‘yicha muzokaralar olib borayotgani yo‘q, Argentina AstraZeneca va Pfizer kompaniyalari bilan ham kelishishga urinmoqda.
Avval Argentina prezidenti Alberto Fernandes Rossiyaning mamlakatga dekabr–yanvar oylari davomida koronavirusga qarshi vaksinaning 25 million dozasini yetkazib berishi haqida gapirgandi.
Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni 41 million, 24-oktabr kuni 42 million, 26-oktabrda esa 43 million kishidan oshgan.
Izoh (0)