Fransiya hukumati koronavirusga chalingan bemorlarning bir qismini Germaniyadagi shifoxonalarda davolash uchun jo’natishga hozirlanmoqda, chunki Fransiyadagi ko‘plab tibbiyot muassasalari kasallanganlar oqimini arang eplamoqda. Bu haqda “Interfaks” xabar berdi.
Xususan, COVID-19 bilan kasallanish bo‘yicha ko‘plab holatlar qayd etilayotgan Nor-Pa-de-Kale viloyatidagi bemorlar yaqin 10 kun ichida Germaniyaga ko‘chirib o‘tkaziladi. Shuningdek, Germaniyaga Fransiyaning boshqa viloyatlaridan ham bemorlar olib boriladi.
Koronavirusning birinchi to‘lqini yuz bergan mart va aprel oylarida ham koronavirusga chalingan ko‘plab fransiyalik bemorlar nafaqat Germaniyadagi, balki Avstriya, Lyuksemburg va Shveysariyadagi shifoxonalarga jo‘natilgan.
Fransiyada pandemiya boshidan buyon 1 460 000 dan ortiq kishida koronavirus qayd etilgan.
Fransiyada 30-oktabrdan 1-dekabrgacha umumiy karantin joriy qilindi. Ulgurji savdo muassasalari, maktablar va maktabgacha ta’lim muassasalari, maktabdan tashqari mashg‘ulotlar o‘tkazuvchi muassasalar, mehmonxonalar, barcha sog‘liqni saqlash muassasalari, jamoat transporti o‘z ishini davom ettiradi.
Diniy ibodat joylari ochiq bo‘ladi, biroq diniy marosimlar taqiqlangan, 30 kishidan ortiq bo‘lmagan kishi qatnashadigan dafn marosimlari va olti kishi ishtirokidagi nikoh marosimlari bundan mustasno. Hayot uchun o‘ta muhim bo‘lmagan mahsulotlarni sotuvchi do‘konlar, shuningdek, restoranlar, kafe va barlar yopilgan. Umumiy ovqatlanish shoxobchalari ovqatni faqat olib ketish uchun tayyorlamoqda.
Avvalroq Italiyada koronavirus sababli yangi cheklovlar joriy qilinishi kutilayotgani haqida xabar berilgandi.
Izoh (0)