Tog‘li Qorabog‘ning tinch aholi yashaydigan hududi Ozarbayjon armiyasi tomonidan o‘qqa tutilishi harbiy jinoyatlarga olib kelishi mumkin. Bu haqda BMTning inson huquqlari bo‘yicha oliy komissari Mishel Bachelet ma’lum qildi, deya xabar bergan “Interfaks-Ukraina”.
Bachelet BMTning avval ham mazkur nizo ishtirokchilarini ogohlikka chaqirgani va fuqarolik infratuzilmalarining vayron bo‘lishi, insonlarning halok bo‘lishiga olib keluvchi hodisalarning oldini olish choralarini ko‘rishga chaqirganini eslatgan.
“Buning o‘rniga uylar vayron qilingan, ko‘chalar xarobaga aylangan, odamlar esa qochish va yerto‘lalarda jon saqlashga majbur bo‘lmoqda”, – degan Bachelet.
BMT vakili shuningdek Ozarbayjon harbiylarining ikki nafar arman askarini osayotgani haqida tarqalgan videoyozuvlar tufayli xavotir keskin ortganini bildirgan.
“Garchi ijtimoiy tarmoqlarda tarqalayotgan suratlarning aksariyati yolg‘on bo‘lsa ham, Ozarbayjon harbiylari tomonidan arman askarlarini qiynoqqa solinishi va osilishi haqida tarqalgan videoyozuvlar xavotirni kuchaytirmoqda, ular jurnalistik tashkilotlar tekshiruvi va tergovni talab qiladi”, – deya ta’kidlagan BMT komissari.
Avval Yevropada xavfsizlik va hamkorlik tashkilotining Minsk guruhi Armaniston va Ozarbayjon tashqi ishlar vazirlari Jenevada uchrashuv o‘tkazgan hamda Tog‘li Qorabog‘dagi fuqarolik obyektlariga o‘t ochmaslikni kelishib olgandi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Izoh (0)