COVID-19 koronavirusi bilan sayyoraning 41 milliondan ortiq aholisi kasallandi, deb xabar bermoqda “Kommersant” Jons Hopkins universiteti ma’lumotlariga tayanib.

Bir kecha-kunduzda dunyoda kasallikni yuqtirib olish bo‘yicha 388 mingta yangi holat qayd etilgan. 21-oktabr kuni bu borada rekord ko‘rsatkich qayd etilgan edi — bir sutkada 440 ming kishi koronavirusga chalingan edi.

Kasallanganlar soni bo‘yicha yetakchilar AQSh (8,3 milliondan ortiq bemor), Hindiston (7,6 million), Braziliya (5,2 million) va Rossiya (1,4 million) bo‘lib qolmoqda. Koronavirus jami 189 ta mamlakatda qayd etilgan.

Eng ko‘p o‘lim holatlari AQSh (221 mingdan ortiq), Braziliya (154 ming), Hindiston (115 ming) va Meksika (86 ming)da kuzatilgan. Dunyo bo‘yicha jami 1,1 million kishi COVID-19 tufayli vafot etgan.

Avvalroq Rossiya hukumati mamlakatda koronavirus tarqalishi tufayli qat’iy cheklovlarni joriy qilishni rejalashtirmayotgani ma’lum qilindi.

Yevropada oktabr oyida ikkita mamlakat — Chexiya va Irlandiya umummilliy lokdaun e’lon qildi.

Ma’lumot uchun, dunyoda koronavirusga chalinganlar soni 30-avgustda 25 million, 11-sentabrda 28 million, 14-sentabrda 29 million, 18-sentabrda 30 million, 21-sentabr kuni 31 million, 5-oktabr kuni 35 million, 11-oktabr kuni 37 million, 14-oktabr kuni 38 million, 19-oktabr kuni 40 million kishidan oshgandi.