Ukrainalik taniqli shifokor va teleboshlovchi Yevgeniy Komarovskiy “Ukraina.ru” nashriga bergan intervyusida koronavirusning uni eng ko‘p tashvishga solayotgan asosiy ajablanarli jihatini aytdi, deb xabar bermoqda Tengrinews.
Komarovskiyning aytishicha, koronavirusning yaqqol va hech qanday shubha tug‘dirmaydigan alomatlariga ega odamlarda test salbiy natija ko‘rsatayotganiga ko‘p bora duch kelmoqda.
Shu bilan birga, Komarovskiyning mijozlari va tanishlarida kasallikning hech qanday simptomlari bo‘lmagan bo‘lsa-da, ko‘pincha yuqori darajada antitanalar borligi aniqlanmoqda. Boshqa laboratoriyada ular bunga teskari natija oladi.
“Mana shu savol meni kasallangan odam organizmidagi antitanalar miqdoridan ko‘ra ko‘proq tashvishga solmoqda”, — degan shifokor.
Komarovskiy bu g‘alati holatni testlarning yetarlicha yuqori sifatga ega emasligi bilan bog‘ladi. “Aftidan, testlar bilan bog‘liq holat benzin bilan bog‘liq holat bilan bir xil. Koronavirusga testlar muvaffaqiyatli biznes-modeliga aylandi. Bu testlarning sifatini kim nazorat qiladi, bilmayman”, — deb ta’kidlagan u.
Izoh (0)