Италияда коронавирус сабабли янги чекловлар жорий қилиниши кутилмоқда

Италия ҳукумати коронавирус билан касалланиш ҳолатларининг ортиши муносабати билан янги чеклов чораларини қабул қилишга мажбур бўлмоқда. Бу ҳақда Италия бош вазири Жузеппе Конте 2 ноябрь куни парламент қуйи палатаси йиғилишида маълум қилди, деб ёзмоқда «Интерфакс».

«Касалланиш ҳолатларининг ортиши биз учун янги чеклов чораларини тайёрлаш ва уларни чоршанба кунигача қабул қилишни зарур қилиб қўйди», — дея маълум қилган бош вазир.

Унинг қайд этишича, мамлакатнинг 15 та ҳудудида бир ой ичида интенсив терапия бўлимларининг касалларни қабул қилиш имкониятлари тугаб қолиши мумкин.

Контенинг таклифига кўра, барча музейларни ёпиш ва бутун мамлакат бўйича шоулар ўтказишни тўхтатиш, шунингдек, дам олиш кунлари савдо марказлари ишини тақиқлаш керак. Мактабларнинг ўрта ва катта синфлар ўқувчилари масофавий таълимга ўтади. Жамоат транспортидаги йўловчилар сони икки бараварга камайтирилиши керак.

Шунингдек, чекловлар қаторидан бутун мамлакат бўйлаб маҳаллий вақт билан соат 21:00 дан кейин бошланадиган комендантлик соати ҳам жой олиши керак. Ана шу вақтда ишлаши керак бўлган кишилар учун бу чекловдан истисно ҳисобланади.

Бош вазирнинг таъкидлашича, мазкур тадбирларнинг тафсилотларини ҳар бир ҳудуддаги эпидемиологик вазиятга боғлиқ равишда мослаштириш керак бўлади.

Италияда сўнгги бир неча кун давомида COVID-19 билан касалланиш бўйича кунига тахминан 30 мингта ҳолат қайд этилмоқда.

Worldometers сайти маълумотларига кўра, Италияда пандемия бошидан буён коронавирус билан касалланиш бўйича 709 335 та ҳолат қайд этилган. Касалланганларнинг 38 826 нафари вафот этган, 292 380 киши касалликдан тузалган.