Turkmanistonlik o‘qituvchilardan odmiroq kiyinish talab qilindi. Dress-kodga amal qilmaganlar maktab yig‘ilishida haydalishi mumkin, deb xabar bermoqda Tengrinews.
Turkmen news ma’lumotlariga ko‘ra, Turkmanobod shahri ma’muriyatida o‘qituvchilar uchun yig‘ilishlar o‘tkazilib, unda pedagoglar kamtarroq bo‘lishga, sochlarini och ranglarga bo‘yamaslikka, tilla taqinchoqlar taqmaslik va tor liboslar kiymaslikka chaqirilmoqda.
Hokimning ta’lim, madaniyat, sog‘liqni saqlash va sport ishlari bo‘yicha o‘rinbosari Gulnora Jumayeva o‘qituvchilar sochlarini ro‘mol ostiga yashirishlari kerakligini aytgan.
Uning fikricha, o‘qituvchilar o‘z tashqi ko‘rinishlaridan tashqari, atrofdagilarni ham kuzatib borishlari kerak, xususan, boshqa ayollarni ham shunga chaqirishi kerak.
O‘qituvchilar bunday buyon “lineyka”ga “nojo‘ya” kiyimda keladigan bo‘lsa, uyga qaytarib yuborilishi haqida ogohlantirilgan.
“Sizni lineykadan haydab yuborganimizdan keyin hukumat tuzilmalaridagi homiylaringiz bizga qo‘ng‘iroq qilib ham o‘tirishmasin: tashqi ko‘rinish haqidagi talablar aynan o‘sha yuqoridagilardan kelib tushadi”, — degan Gulnora Jumayeva.
“Xronika Turkmenistana” nashri ma’lumotlariga ko‘ra, Turkmaniston hukumati ayollar tashqi ko‘rinishini 2018-yildan boshlab nazorat qilishni boshlagan. Davlat tashkilotlarida ishlaydigan ayollarga tirnoqlarini o‘stirish va bo‘yash, sochlarni ochartirish va tilla taqinchoqlar taqish taqiqlangan.
Universitetlardagi o‘qituvchilar kiyinish qoidalariga qat’iy rioya qilishlari va ko‘ylak tagidan turkman ayollarining balaki lozimini kiyish kerakligi to‘g‘risida ogohlantiriladi.
Qayd etilishicha, bunday talablar rasmiy emas va mahalliy rasmiylarga yuqori turuvchi mansabdor shaxslar tomonidan og‘zaki ravishda beriladi.
Izoh (0)