Туркманистонлик ўқитувчилардан одмироқ кийиниш талаб қилинди. Дресс-кодга амал қилмаганлар мактаб йиғилишида ҳайдалиши мумкин, деб хабар бермоқда Tengrinews.
Turkmen news маълумотларига кўра, Туркманобод шаҳри маъмуриятида ўқитувчилар учун йиғилишлар ўтказилиб, унда педагоглар камтарроқ бўлишга, сочларини оч рангларга бўямасликка, тилла тақинчоқлар тақмаслик ва тор либослар киймасликка чақирилмоқда.
Ҳокимнинг таълим, маданият, соғлиқни сақлаш ва спорт ишлари бўйича ўринбосари Гулнора Жумаева ўқитувчилар сочларини рўмол остига яширишлари кераклигини айтган.
Унинг фикрича, ўқитувчилар ўз ташқи кўринишларидан ташқари, атрофдагиларни ҳам кузатиб боришлари керак, хусусан, бошқа аёлларни ҳам шунга чақириши керак.
Ўқитувчилар бундай буён «линейка»га «ножўя» кийимда келадиган бўлса, уйга қайтариб юборилиши ҳақида огоҳлантирилган.
«Сизни линейкадан ҳайдаб юборганимиздан кейин ҳукумат тузилмаларидаги ҳомийларингиз бизга қўнғироқ қилиб ҳам ўтиришмасин: ташқи кўриниш ҳақидаги талаблар айнан ўша юқоридагилардан келиб тушади», — деган Гулнора Жумаева.
«Хроника Туркменистана» нашри маълумотларига кўра, Туркманистон ҳукумати аёллар ташқи кўринишини 2018 йилдан бошлаб назорат қилишни бошлаган. Давлат ташкилотларида ишлайдиган аёлларга тирноқларини ўстириш ва бўяш, сочларни очартириш ва тилла тақинчоқлар тақиш тақиқланган.
Университетлардаги ўқитувчилар кийиниш қоидаларига қатъий риоя қилишлари ва кўйлак тагидан туркман аёлларининг балаки лозимини кийиш кераклиги тўғрисида огоҳлантирилади.
Қайд этилишича, бундай талаблар расмий эмас ва маҳаллий расмийларга юқори турувчи мансабдор шахслар томонидан оғзаки равишда берилади.
Изоҳ (0)