“Liverpul” Angliya Premyer Ligasining 7-turida “Vest Hem”ni mag‘lub etdi (2:1).
Shu tariqa mersisaydliklar “Enfild”dagi so‘nggi 63 o‘yinda birorta marta ham mag‘lubiyat alamini totib ko‘rmadi. Mazkur seriya 2017-yilning aprel oyidan buyon davom etmoqda. O‘shanda jamoa “Kristal Pelas”ga imkoniyatni boy berib qo‘ygandi (1:2).
Yurgen Klopp boshchiligidagi jamoa 63 uchrashuvdan 52 tasida g‘alaba qozongan, yana 11 ta o‘yin esa durang bilan yakunlangan.
Shuningdek, “Liverpul” mazkur ko‘rsatkich bo‘yicha klubning 1978—1980-yillarda o‘rnatilgan rekordni ham takrorlashga muvaffaq bo‘ldi.
Angliya chempionati yuqori divizionidagi rekord ko‘rsatkich “Chelsi”ga tegishli bo‘lib, “aristokratlar” 2004—2008-yillarda o‘z uyida 86 ta mag‘lubiyatsiz o‘yin o‘tkazgan.
“Liverpul” 7-turdan keyin 16 ochko bilan 1-o‘rinda bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)