“Koronavirus belgilari bor bolalar 20 kun, belgisizlar 14 kun davomida yuqumli bo‘ladi” — Koronavirusga qarshi kurash shtabi a’zosi

Oilasida koronavirus aniqlangan, biroq farzandlarida uning hech bir belgilari kuzatilmayotgan ota-onalar bolalarni o‘quv muassasalariga yubormasligi tavsiya etiladi. Janubiy Koreya hamda boshqa davlatlar olimlarining izlanishlari natijasida koronavirus simptomlari bor bolalar organizmida virus 20 kun, simptomsiz kechadiganlarida esa 14 kun hosil bo‘lishi aniqlangan. Bu haqda Koronavirusga qarshi kurash shtabi a’zosi Barno Abdusamatova AOKA huzurida tashkil etilgan brifingda gapirib o‘tgan.

Jumladan, mutaxassis “Turmush o‘rtog‘imning onalarida koronavirus testi musbat chiqdi. Farzandim maktabgacha ta’lim muassasasiga bormasligi kerakmi, u virus tashuvchisi hisoblanadimi? Farzandimda virusning biror-bir belgisi kuzatilmadi, u sog‘lom”, degan savolga javob bergan.

Farzandingizda kasallik belgilari kuzatilmasa-da, o‘quv muassasasiga 14 kun davomida bormasdan tibbiy nazoratda bo‘lishi kerak. Chunki biz bir necha marta aytib o‘tmoqdamiz, bolalarda koronavirus keltirib chiqaradigan COVID-19 kasalligi ko‘pchilik holatlarda yengil yoki klinik belgilarsiz (simptomlarsiz) kechsa ham, ular ushbu virusning asosiy tarqatuvchilaridan biri bo‘lishlari va o‘z oilalaridagi kattalarga, ayniqsa, xavf ostidagi guruhlardagi qarindoshlariga, o‘qituvchilarga, tarbiyachilarga yuqtirishi, aholi o‘rtasida kasallikni ko‘payishiga olib kelishi mumkin.

Barno Abdusamatova, Koronavirusga qarshi kurash shtabi a’zosi

Abdusamatovaga ko‘ra, Janubiy Koreya hamda boshqa ko‘pgina davlatlar olimlarining izlanishlari natijasida koronavirus simptomlari bor bolalar organizmida virus 20 kun, simptomsiz kechadiganlarida esa 14 kun hosil bo‘lishi aniqlangan. Ushbu izlanishlar natijalariga ko‘ra, Koreyada ko‘pgina ota-onalar va o‘qituvchilar kasallikni bolalaridan yuqtirganliklari aniqlangan.

“Shuning uchun farzandingizni va barcha oila a’zolaringizni 14 kun davomida tibbiyot xodimlari kuzatuvi ostida bo‘lishi tavsiya etiladi. Chunki siz ham kasallikni yengil o‘tkazayotgan bo‘lishingiz mumkin. Lekin ko‘chaga chiqib va  ishga borib xavf guruhiga kiruvchi insonlarga, ya’ni surunkali kasalliklari bor bemorlarga, katta yoshdagilarga, homiladorlarga va bolalarga virus yuqtirishingiz mumkin”,— deydi mutaxassis.

Eslatib o‘tamiz, Respublika maxsus komissiyasi va Koronavirusga qarshi kurash shtabi a’zosi Nurmat Otabekov AOKA huzurida tashkil etilgan brifingda O‘zbekistonda yosh bolalar orasida koronavirus kasalligi soni ko‘payishi natijasida ko‘plab bolalar vafot etayotgani xususidagi gaplar haqiqatdan yiroqligini bildirgan.  Avvalroq Barno Abdusamatova O‘zbekistonda shu kungacha koronavirusga chalinganlarning 3 932 nafari bolalar bo‘lib, ular orasida o‘lim holatlari qayd etilmagani, bolalar orasida kasallik 7-18 yoshgacha bo‘lganlarda ko‘p uchrayotgani, umumiy kasallanish ko‘rsatkichining 55 foizini bolalar tashkil etishini aytgan.