O‘zbekistonda rasmiy statistik ma’lumotlar bo‘yicha shu kungacha koronavirusga chalinganlarning 3 932 nafari bolalar bo‘lib, ular orasida o‘lim holatlari qayd etilmagan. Bu haqda Sog‘liqni saqlash vazirligi huzuridagi Koronavirusga qarshi kurashish bo‘yicha shtab a’zosi Barno Abdusamatova 28-avgust kuni ma’lum qildi.

Ma’lum qilishlaricha, shu kungacha 89 755 nafar bola karantinga olingan, ularning 3 932 nafarida koronavirus aniqlangan. Qayd etishlaricha, O‘zbekistonda koronavirusga chalingan bolalarning

  • 190 nafari (4,8 foizi) 1 yoshgacha,
  • 683 nafari (17,4 foizi) 3 yoshgacha,
  • 934 nafari (23,8 foizi) 3 yoshdan 7 yoshgacha,
  • 2125 nafari (54 foizi) 7 yoshdan 18 yoshgacha

bo‘lgan bolalardir. Hozirgacha ularning 3293 nafari sog‘aygan.

“Bolalar orasida kasallikning o‘ta og‘ir kechishi va o‘lim holati bo‘lmadi”, — deya qo‘shimcha qildi SSV huzuridagi shtab a’zosi Barno Abdusamatova. Qayd etish joiz, avvalroq SSV huzuridagi shtabning boshqa a’zolari — Nurmat Otabekov va Habibulla Oqilov O‘zbekistonda koronavirus infeksiyasi asoratlari oqibatida vafot etganlar orasida 14 yoshli bola borligini ma’lum qilgan edi.

Nurmatov va Oqilovning so‘zlarini SSV tomonidan e’lon qilib borilayotgan kunlik statistik ma’lumotlar asosida tekshirish imkoni yo‘q, chunki vazirlik barcha o‘lim holatlari haqida aniq bir standart asosida axborot bermagan (xususan, ayrim o‘lim holatlari haqidagi axborotlarda qurbonlarning yoshi va jinsi ko‘rsatilmagan).