«Коронавирус белгилари бор болалар 20 кун, белгисизлар 14 кун давомида юқумли бўлади» — Коронавирусга қарши кураш штаби аъзоси

Оиласида коронавирус аниқланган, бироқ фарзандларида унинг ҳеч бир белгилари кузатилмаётган ота-оналар болаларни ўқув муассасаларига юбормаслиги тавсия этилади. Жанубий Корея ҳамда бошқа давлатлар олимларининг изланишлари натижасида коронавирус симптомлари бор болалар организмида вирус 20 кун, симптомсиз кечадиганларида эса 14 кун ҳосил бўлиши аниқланган. Бу ҳақда Коронавирусга қарши кураш штаби аъзоси Барно Абдусаматова АОКА ҳузурида ташкил этилган брифингда гапириб ўтган.

Жумладан, мутахассис «Турмуш ўртоғимнинг оналарида коронавирус тести мусбат чиқди. Фарзандим мактабгача таълим муассасасига бормаслиги керакми, у вирус ташувчиси ҳисобланадими? Фарзандимда вируснинг бирор-бир белгиси кузатилмади, у соғлом», деган саволга жавоб берган.

Фарзандингизда касаллик белгилари кузатилмаса-да, ўқув муассасасига 14 кун давомида бормасдан тиббий назоратда бўлиши керак. Чунки биз бир неча марта айтиб ўтмоқдамиз, болаларда коронавирус келтириб чиқарадиган COVID-19 касаллиги кўпчилик ҳолатларда енгил ёки клиник белгиларсиз (симптомларсиз) кечса ҳам, улар ушбу вируснинг асосий тарқатувчиларидан бири бўлишлари ва ўз оилаларидаги катталарга, айниқса, хавф остидаги гуруҳлардаги қариндошларига, ўқитувчиларга, тарбиячиларга юқтириши, аҳоли ўртасида касалликни кўпайишига олиб келиши мумкин.

Барно Абдусаматова, Коронавирусга қарши кураш штаби аъзоси

Абдусаматовага кўра, Жанубий Корея ҳамда бошқа кўпгина давлатлар олимларининг изланишлари натижасида коронавирус симптомлари бор болалар организмида вирус 20 кун, симптомсиз кечадиганларида эса 14 кун ҳосил бўлиши аниқланган. Ушбу изланишлар натижаларига кўра, Кореяда кўпгина ота-оналар ва ўқитувчилар касалликни болаларидан юқтирганликлари аниқланган.

«Шунинг учун фарзандингизни ва барча оила аъзоларингизни 14 кун давомида тиббиёт ходимлари кузатуви остида бўлиши тавсия этилади. Чунки сиз ҳам касалликни енгил ўтказаётган бўлишингиз мумкин. Лекин кўчага чиқиб ва  ишга бориб хавф гуруҳига кирувчи инсонларга, яъни сурункали касалликлари бор беморларга, катта ёшдагиларга, ҳомиладорларга ва болаларга вирус юқтиришингиз мумкин»,— дейди мутахассис.

Эслатиб ўтамиз, Республика махсус комиссияси ва Коронавирусга қарши кураш штаби аъзоси Нурмат Отабеков АОКА ҳузурида ташкил этилган брифингда Ўзбекистонда ёш болалар орасида коронавирус касаллиги сони кўпайиши натижасида кўплаб болалар вафот этаётгани хусусидаги гаплар ҳақиқатдан йироқлигини билдирган.  Аввалроқ Барно Абдусаматова Ўзбекистонда шу кунгача коронавирусга чалинганларнинг 3 932 нафари болалар бўлиб, улар орасида ўлим ҳолатлари қайд этилмагани, болалар орасида касаллик 7-18 ёшгача бўлганларда кўп учраётгани, умумий касалланиш кўрсаткичининг 55 фоизини болалар ташкил этишини айтган.