O‘zbekistonda suyultirilgan gaz ballonlari onlayn nazoratga olinadi

O‘zbekistonda 2020-yilning 15-oktabridan boshlab “Hududgazta’minot” AJ tomonidan respublika hududlari bo‘ylab maishiy gaz ballonlariga shtrix kodli stikerlarni o‘rnatish ishlari boshlandi, deya xabar bermoqda Energetika vazirligi.

Ma’lum qilinishicha, bu tizim quyidagi tartibda amalga oshiriladi:

• I bosqich — maishiy gaz ballonlariga maxsus shtrix kodli stikerlar o‘rnatiladi;
• II bosqich — iste’molchilar ID kartalar bilan ta’minlanadi;
• III bosqich — mazkur jarayonlar “E-gaz” onlayn tizimiga ulanadi.

Shu bilan birga, bu tizimda gaz ballon tarqatish oralig‘i 45 kun bo‘lsa, 45 kun ichida faqatgina bir marta pul yechib olinadi. Ya’ni 45 kun ichida ikkinchi bor gaz ballon olishning imkoni bo‘lmaydi.

Avtomatlashtirilgan tizimda belgilangan mablag‘ tegishli muddatda yechib olinadi. Ya’ni haydovchi-ekspeditor va ta’minotchi xodimlar tomonidan gaz ballon uchun qo‘ldan naqd pul olinishiga yo‘l qo‘yilmaydi. Bu suyultirilgan gaz ta’minotida ko‘rsatilayotgan xizmat sifatini yana-da oshirib, tizimdagi korrupsiya holatlarini bartaraf etishga imkon berishi qayd etilgan.

Avvalroq aholiga suyultirilgan gaz yetkazib berishda kechikish holatlari bo‘layotganiga izoh berilgandi.