Andijonda IIB xodimlari fuqarolarning shaxsiga doir ma’lumotlardan noqonuniy foydalanib, ularning nomiga UzIMEI tizimi orqali telefonlarni ro‘yxatdan o‘tkazish bilan shug‘ullanib kelgan shaxslar qo‘lga olindi. Bu haqda viloyati IIV axborot xizmati xabar berdi.
Ma’lumotlarga ko‘ra, Andijon shahrida uyali telefonlar bilan savdosi bilan shug‘ullanuvchi Jasur va Hikmatillo ismli yigitlar bir ayolning telefonini 14-sentabr kuni Qirg‘izistondan kelgan fuqaroning nomiga IMEI orqali ro‘yxatdan o‘tkazib bergan. Xizmati uchun 270 ming so‘m miqdorida pul olayotganida ushbu ikki shaxs qo‘lga olingan.
Surishtiruv davomida ularning boshqa sheriklari ham fosh etilgan. Ular dastlab 100 dona turli rusumdagi uyali telefon qurilmalarining har bir donasi uchun Nodir ismli shaxsga 13 dollardan IMEI’dan ro‘yxatdan o‘tkazishga kelishib, unga 1300 dollar bergan. Ta’kidlanishicha, ushbu aloqa vositalarining IMEI kodlari Telegram orqali yuborilib, hozirda mingga yaqin telefonning IMEI kodlari UzIMEI tizimida ro‘yxatdan o‘tkazgan.
Shuningdek, 20-avgust kuni Istanbuldan charter reys bilan O‘zbekistonga qaytib kelgan toshkentlik fuqaro IIVga murojaat qilib, uning nomiga kimdir IMEI ro‘yxatdan o‘tkazgani va shu sababli o‘zining telefonini UzIMEI’da ro‘yxatga qo‘ya olmayotganini ma’lum qilgan.
IIV Tezkor-qidiruv hamkorligi boshqarmasi va Andijon viloyati IIB xodimlari bilan hamkorlikda o‘tkazilgan tadbir davomida buni sodir etgan shaxs aniqlangan. Ma’lum bo‘lishicha, ushbu fuqaroning ham yuqoridagi shaxslar bilan aloqasi bo‘lgan.
Hozirda holat yuzasidan Jinoyat kodeksining 182-modda 2-qismi (bojxona to‘g‘risidagi qonun hujjatlarini buzish) hamda 141-modda 1-qismi (fuqarolarning teng huquqliligini buzish) bilan jinoyat ishi qo‘zg‘atilgan.
Avvalroq Axborot texnologiyalari va kommunikatsiyalarni rivojlantirish vazirligi boshqa shaxslarning pasport ma’lumotlari bilan telefonlarning IMEI kodini ro‘yxatdan o‘tkazayotganlarga nisbatan tergov-surishtiruv olib borilayotganini, Davlat bojxona qo‘mitasi IMEI kodlarni ro‘yxatdan o‘tkazishda yuzaga kelayotgan muammolar bo‘yicha tekshiruv o‘tkazayotganini ma’lum qilgandi. O‘zbekiston Ichki ishlar vazirligi IMEI kodlar bilan bog‘liq muammolar yuzaga kelganda ichki ishlar organlariga murojaat qilishga chaqirgandi.
Keyinroq Davlat bojxona qo‘mitasi ushbu muammoli masala yuzasidan bir qator choralar amalga oshirilganini hamda IMEI kodlarini boshqa shaxslar nomiga ro‘yxatdan o‘tkazish bilan shug‘ullangan jinoiy guruh fosh etilganini ma’lum qildi.
22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgani ma’lum qilindi. Ushbu tartibga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerak. Biroq qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkin, deb hisoblamoqda.
Izoh (0)