Andijonda 27-oktabrdan boshlab viloyat hududidagi jami 81 ta avtomobillarga gaz to‘ldirish shoxobchalari (gaz-zapravkalar)ga tabiiy gazni yetkazib berish har kuni tong soat 06:00 dan kech soat 16:00 ga qadar amalga oshiriladi. Bu haqda “Hududgaz Andijon” kompaniyasi ma’lum qildi.
Kompaniya bayonotida qayd etilishicha, “qish mavsumida tabiiy gazni yetkazib berishda texnologik rejim jarayonlaridagi gaz bilan bog‘liq ishlar bajarilishi munosabati bilan, viloyatga keluvchi tabiiy gaz bosimida pasayish kuzatilmoqda”. Shu sababli yetkazib berilgan tabiiy gaz taqsimotiga ko‘ra, gaz birinchi navbatda aholi va ijtimoiy soha obyektlarini uzluksiz ravishda ta’minlashga qaratilgan.
“Yuqoridagilardan kelib chiqib, avtomobillarga gaz to‘ldirish shoxobchalariga tabiiy gazni yetkazib berish 27-oktabrdan tong soat 06:00 dan kech soat 16:00 ga qadar belgilandi. Viloyatimizdagi haydovchilardan o‘z avtoulovlariga gaz to‘ldirishda har kunlik belgilangan vaqt (06:00 – 16:00) oralig‘ida gaz to‘ldirish ishlarini texnika xavfsizligi qoidalari asosida amalga oshirishlarini so‘raymiz”, — deyiladi kompaniya axborotida.
“Daryo” muxbirining ma’lum qilishicha, so‘nggi kunlarda viloyatdagi gaz-zapravkalar oldida navbatlar yuzaga kelishni boshlagan. “Hududgaz Andijon” kompaniyasi vakilining “Daryo” muxbiriga ma’lum qilishicha, gaz-zapravkalarga cheklangan vaqt davomida gaz yetkazib berish tartibi qachongacha davom etishi noma’lum, 2021-yil bahorigacha davom etishi ham mumkin.
“Daryo”ning Namangan, Samarqand, Qashqadaryo, Farg‘ona viloyatlaridagi muxbirlari hozircha ushbu hududlardagi gaz-zapravkalarda Andijondagi kabi cheklovlar o‘rnatilmaganini ma’lum qildi. “Daryo” vaziyat yuzasidan izoh olish uchun respublika “Hududgaz ta’minot” kompaniyasiga murojaat qildi.
Qayd etish joiz, 21-oktabr kuni o‘tkazilgan videoselektor yig‘ilishida Prezident Shavkat Mirziyoyev yil yakuni bilan tabiiy gaz qazib olishni ko‘paytirish, ichki bozorga qo‘shimcha gaz yetkazib berish bo‘yicha topshiriqlar bergan edi. Avvalroq O‘zbekistondagi loyihalaridan Xitoyga gaz eksport qilishni to‘xtatgan Rossiyaning “Lukoyl” kompaniyasi gazni O‘zbekistonning ichki bozoriga yo‘naltirish bo‘yicha hukumat bilan kelishuvga erishgani ma’lum bo‘lgan edi.
E’tiborga molik tomoni, 16-oktabr kuni “Hududgaz ta’minot” kompaniyasi vakili Abdusattor Qayumov gaz eksportining qisqarishi (O‘zbekiston 2019-yilda 2 milliard dollarlik gaz eksport qilgan bo‘lsa, 2020-yilda gaz eksportidan tushgan daromad 5,5 barobarga qisqarib, hozirgacha 366,3 million dollarni tashkil etmoqda) ichki bozorga gaz yetkazib berish hajmini oshirishga imkon bermaganini tan olgan edi. Qayumov bunga sabab qilib yangi qurilayotgan ko‘p qavatli uylarning isitish tizimi markazlashgan emas, balki lokal ekanini ko‘rsatgan.
Eslatib o‘tamiz, 2018—2019-yillarda O‘zbekistonning ayrim hududlari, xususan, Farg‘ona vodiysi viloyatlarida bir necha bor “gaz inqirozi” yuz bergan edi. Gaz bosimi pasayib ketgani bois viloyatlardagi gaz-zapravkalarning aksariyat faoliyatini vaqtincha to‘xtatgan, oqibatda ishini davom ettirayotgan gaz-zapravkalar oldida kilometrlik navbatlar yuzaga kelgan edi. Ayni vaqtda, ushbu hududlarda gaz taqchilligi ortidan yo‘l haqining oshishi ham kuzatilgandi. O‘shanda muammo gazni Qozog‘iston orqali transportirovka qilish hisobiga birmuncha hal etilgan edi.
Izoh (0)