1-oktabr holatiga ko‘ra, O‘zbekistonning doimiy aholisi yil boshidan buyon 477,5 mingga, ya’ni 1,4 foizga ko‘payib, 34,38 million kishiga yetdi. Bu haqda Davlat statistika qo‘mitasining mamlakatdagi demografik vaziyatga bog‘liq hisobotida so‘z boradi.
Shaharlar aholisining ulushi 17,4 millionga (umumiy aholining 50,6 foizi), qishloqlarniki esa 16,9 million kishiga (49,4 foiz) yetgan.
Aholining asosiy qismi Samarqand (11,4 foiz), Farg‘ona (11,1 foiz), Qashqadaryo (9,7 foiz) va Andijon (9,2 foiz) viloyatlari hisobiga to‘g‘ri kelmoqda.
Qo‘mita ma’lumotlariga ko‘ra, doimiy aholi umumiy sonining 30,9 foizi hali mehnatga layoqatsiz yoshdagi shaxslar bo‘lsa, 58,4 foizi — mehnatga layoqatli yoshdagilar va 10,7 foizi — mehnatga layoqatli yoshdan o‘tganlar.
Shu yilning yanvar— sentabr oylari davomida 614,7 ming chaqaloq dunyoga kelgani ro‘yxatdan o‘tkazilgan bo‘lib, tug‘ilish koeffitsiyenti har 1000 kishiga 24 promilleni tashkil etgan va bu o‘tgan yilning mos davriga nisbatan 0,5 promillega ko‘p demak.
Shuningdek, o‘tgan davr mobaynida 184 mingta nikoh qayd etilgan. Eng ko‘p nikoh koeffitsiyenti (promilleda) Sirdaryo (9,1), Jizzax (8,4), Qashqadaryo (7,9) va Navoiy (7,8) viloyatlarida ro‘yxatdan o‘tkazilgan.
Bundan tashqari, yanvar—sentabr oylari davomida 20 mingta ajrashish holatlari qayd etilgan. Eng yuqori ajrashish holatlari Toshkent shahrida (1,4), Sirdaryo (1,3), Andijon (1), Navoiy (0,9) va Toshkent viloyatlarida (0,9) qayd etilgan.
Ushbu davr mobaynida mamlakatga kelgan fuqarolar soni 137,3 ming kishini tashkil qilmoqda, ketganlar — 139,7 ming. Migratsiya saldosi 2400 kishiga kamaygan.
Eslatib o‘tamiz, 2020-yil 1-iyul holatiga ko‘ra, O‘zbekiston doimiy aholisi soni yil boshidan 285 ming 900 kishiga ko‘paygani ma’lum qilingan edi. 2020-yil 1-yanvarda bu ko‘rsatkich 33 million 905 ming 800 ming kishini, 1-aprelda esa 34 million 36 ming 756 kishini tashkil etgan.
Izoh (0)