Андижонда ИИБ ходимлари фуқароларнинг шахсига доир маълумотлардан ноқонуний фойдаланиб, уларнинг номига UzIMEI тизими орқали телефонларни рўйхатдан ўтказиш билан шуғулланиб келган шахслар қўлга олинди. Бу ҳақда вилояти ИИВ ахборот хизмати хабар берди.
Маълумотларга кўра, Андижон шаҳрида уяли телефонлар билан савдоси билан шуғулланувчи Жасур ва Ҳикматилло исмли йигитлар бир аёлнинг телефонини 14 сентябрь куни Қирғизистондан келган фуқаронинг номига IMEI орқали рўйхатдан ўтказиб берган. Хизмати учун 270 минг сўм миқдорида пул олаётганида ушбу икки шахс қўлга олинган.
Суриштирув давомида уларнинг бошқа шериклари ҳам фош этилган. Улар дастлаб 100 дона турли русумдаги уяли телефон қурилмаларининг ҳар бир донаси учун Нодир исмли шахсга 13 доллардан IMEI’дан рўйхатдан ўтказишга келишиб, унга 1300 доллар берган. Таъкидланишича, ушбу алоқа воситаларининг IMEI кодлари Telegram орқали юборилиб, ҳозирда мингга яқин телефоннинг IMEI кодлари UzIMEI тизимида рўйхатдан ўтказган.
Шунингдек, 20 август куни Истанбулдан чартер рейс билан Ўзбекистонга қайтиб келган тошкентлик фуқаро ИИВга мурожаат қилиб, унинг номига кимдир IMEI рўйхатдан ўтказгани ва шу сабабли ўзининг телефонини UzIMEI’да рўйхатга қўя олмаётганини маълум қилган.
ИИВ Тезкор-қидирув ҳамкорлиги бошқармаси ва Андижон вилояти ИИБ ходимлари билан ҳамкорликда ўтказилган тадбир давомида буни содир этган шахс аниқланган. Маълум бўлишича, ушбу фуқаронинг ҳам юқоридаги шахслар билан алоқаси бўлган.
Ҳозирда ҳолат юзасидан Жиноят кодексининг 182-модда 2-қисми (божхона тўғрисидаги қонун ҳужжатларини бузиш) ҳамда 141-модда 1-қисми (фуқароларнинг тенг ҳуқуқлилигини бузиш) билан жиноят иши қўзғатилган.
Аввалроқ Ахборот технологиялари ва коммуникацияларни ривожлантириш вазирлиги бошқа шахсларнинг паспорт маълумотлари билан телефонларнинг IMEI кодини рўйхатдан ўтказаётганларга нисбатан тергов-суриштирув олиб борилаётганини, Давлат божхона қўмитаси IMEI кодларни рўйхатдан ўтказишда юзага келаётган муаммолар бўйича текширув ўтказаётганини маълум қилганди. Ўзбекистон Ички ишлар вазирлиги IMEI кодлар билан боғлиқ муаммолар юзага келганда ички ишлар органларига мурожаат қилишга чақирганди.
Кейинроқ Давлат божхона қўмитаси ушбу муаммоли масала юзасидан бир қатор чоралар амалга оширилганини ҳамда IMEI кодларини бошқа шахслар номига рўйхатдан ўтказиш билан шуғулланган жиноий гуруҳ фош этилганини маълум қилди.
22 сентябрь куни мобил қурилмаларнинг IMEI кодларини рўйхатдан ўтказиш тизими маъмурияти томонидан мобил қурилмаларни UzIMEI тизимида рўйхатдан ўтказиш жараёнига ўзгартириш киритилгани маълум қилинди. Ушбу тартибга кўра, қурилманинг IMEI кодини/кодларини рўйхатдан ўтказишда жисмоний шахслар томонидан фойдаланиладиган абонент рақами маҳаллий мобил операторларидан ариза берувчи номига расмийлаштирилган бўлиши керак. Бироқ қатор ОАВ ва блогерлар мазкур ўзгариш қонунга зид равишда амалга оширилган бўлиши мумкин, деб ҳисобламоқда.
Изоҳ (0)