AQShda 1970-yilda ishlab chiqarilgan noyob AMC AMX/3 konsept-kari sotuvga qo‘yildi. Bugungi kunga qadar saqlanib qolgan uchta maslkardan birini 400 ming dollarga xarid qilish mumkin, deb xabar beradi Motor.
AMC AMX/3 maslkarlar davrining tugash arafasida yaratilgan. Prototip 1970-yilda Chikago avtosalonida taqdim etilgan. Model American Motors korporatsiyasi tarixidagi eng yaxshi muhandislik ishi deya tan olingan. Shu sababli maslkar kelajagiga katta umid bildirilgan. Muhandislar ushbu modeldan yiliga 5 ming nusxa chiqarishni rejalashtirgan, ammo moliyaviy qiyinchiliklar sabab loyihani 70-yillar boshida yopishga to‘g‘ri kelgan.
Amerikalik muhandislar BMW va Bizzarrini mutaxassislari bilan birga to‘qqizta AMC AMX 3 ustida ish olib borishga ulgurgan. Bugungi kunga qadar ularning beshtasi saqlanib qolgan bo‘lib, modellarning ikkitasi yakuniga yetmay qolgan. Loyiha asosini Amerikaning bundan oldingi AMX/2 loyihasi tashkil etgan. Mutaxassislar yangi avtomobilning po‘lat kuzovini ancha silliq ishlab, kapotdagi ikkita havo o‘tkazgich panjaralarini hamda ochiladigan faralarni saqlab qolgan. Shu bilan birga, orqa oyna butun qolgan, spoyler esa avtomatik ravishda chiqqan.
AMC AMX/3 340 ot kuchiga ega 6,4 litrli V8 dvigateli yordamida harakatga keladi. Agregat to‘rt pog‘onali mexanik uzatmalar qutisi bilan birgalikda ishlaydi. 1300 kilogrammli maslkar soatiga 100 kilometr tezlikka 5,5 soniyada erishadi.
Avvalroq Avstraliyada achinarli ahvoldagi noyob Ford Falcon 300 ming dollarga sotilgani to‘g‘risida xabar berilgandi.
Izoh (0)