Bring a Trailer auksioni orqali 1996-yilda ishlab chiqarilgan va hozirga qadar 1126 kilometr yo‘l bosgan Chevrolet Corvette 27,5 ming dollar evaziga sotuvga qo‘yildi. Sportkarning o‘ziga xosligi — avtomobil to‘rtinchi avlod modelning yakunlanishiga bag‘ishlangan kolleksiyaning bir qismi hisoblanadi, deb xabar beradi Motor.
Chevrolet Corvette Grand Sport to‘rtinchi avlod modelni ishlab chiqarishning yakunlanishiga bag‘ishlangan xayrlashuv maxsus versiyasi hisoblanadi. Corvette C4 1983—1996-yillar oralig‘ida konveyrdan chiqqan. Amerika konserni bu turdagi nusxadan jami 810 ta ishlab chiqargan bo‘lib, ularning har biri Admiral Blue noyob ko‘k rangiga bo‘yalgan.
Savdoga qo‘yilgan nusxa ajoyib holatda saqlangan. Kupening kuzovida hech qanday nuqsonlar yo‘q, qora charm qoplangan saloni esa xuddi yangidek. Sportkarga 17 dyuymli qora g‘ildirak diskalari “kiygizilgan”. Shuningdek, Corvette’da iqlim va kruiz-nazorat tizimlari, o‘rindiqlarni moslash tizimi va kassetali va kompakt-diskli Bose audiotizimi mavjud.
Corvette Grand Sport kapoti ostidan 330 ot kuchiga (461 Nm) ega 5,7 litrli V8 dvigateli o‘rin olgan. Sportkar agregati olti pog‘onali mexanik uzatmalar qutisi bilan birgalikda ishlaydi. Kupe soatiga 100 kilometr tezlikka 5,4 soniyada erishadi. Maksimal tezligi — 266 km/soatga teng.
Ayni vaqtda cheklangan nusxada ishlab chiqarilgan Corvette’ning auksiondagi narxi 27,5 ming dollarni tashkil etmoqda.
Avvalroq ideal holatda saqlangan 51 yoshli Chevrolet Corvette sotuvga qo‘yilgani to‘g‘risida xabar berilgandi.
Izoh (0)