UzAuto Motors kompaniyasi Monopoliyaga qarshi kurashish qo‘mitasini OAVga bosim o‘tkazayotganlikda ayblagani to‘g‘risida xabar berilgandi. Axborot va ommaviy kommunikatsiyalar agentligi UzAuto Motors’ning mazkur ayblovi yuzasidan o‘z vakolati doirasida to‘liq o‘rganishlar amalga oshirilishini ma’lum qilgandi.
AOKA tomonidan ma’lum qilinishicha, UzAuto Motors’ning Monopoliyaga qarshi kurashish qo‘mitasiga nisbatan qo‘ygan ayblovi bilan bog‘liq vaziyat o‘rganib chiqildi.
“Ushbu masalani o‘rganish natijasida UzAuto Motors taqdim etgan ma’lumot o‘z tasdig‘ini topmadi. Agentlik tomonidan 15 ta yetakchi elektron ommaviy axborot vositalari rahbarlari o‘rtasida so‘rov o‘tkazilib, mazkur sud ishini yoritishda Monopoliyaga qarshi kurashish qo‘mitasi tomonidan hech qanday bosim o‘tkazilmagani qayd etildi”, — deyiladi AOKA xabarida.
Ushbu masala yuzasidan AOKA tomonidan UzAuto Motors AJga asossiz ma’lumotni tarqatmaslik va bu kabi holatlarga yo‘l qo‘ymaslik bo‘yicha tegishli ogohlantirish kiritiladi.
Shuningdek, agentlik asossiz, yolg‘on ma’lumotlarni tarqatish uchun javobgarlik borligini eslatib o‘tgan, yuridik va jismoniy shaxslar hamda OAVga tarqatilayotgan ma’lumotlarning asosliligini tekshirishni tavsiya qilgan.
Izoh (0)