UzAuto Motors компанияси Монополияга қарши курашиш қўмитасини ОАВга босим ўтказаётганликда айблагани тўғрисида хабар берилганди. Ахборот ва оммавий коммуникациялар агентлиги UzAuto Motors’нинг мазкур айблови юзасидан ўз ваколати доирасида тўлиқ ўрганишлар амалга оширилишини маълум қилганди.
АОКА томонидан маълум қилинишича, UzAuto Motors’нинг Монополияга қарши курашиш қўмитасига нисбатан қўйган айблови билан боғлиқ вазият ўрганиб чиқилди.
«Ушбу масалани ўрганиш натижасида UzAuto Motors тақдим этган маълумот ўз тасдиғини топмади. Агентлик томонидан 15 та етакчи электрон оммавий ахборот воситалари раҳбарлари ўртасида сўров ўтказилиб, мазкур суд ишини ёритишда Монополияга қарши курашиш қўмитаси томонидан ҳеч қандай босим ўтказилмагани қайд этилди», — дейилади АОКА хабарида.
Ушбу масала юзасидан АОКА томонидан UzAuto Motors АЖга асоссиз маълумотни тарқатмаслик ва бу каби ҳолатларга йўл қўймаслик бўйича тегишли огоҳлантириш киритилади.
Шунингдек, агентлик асоссиз, ёлғон маълумотларни тарқатиш учун жавобгарлик борлигини эслатиб ўтган, юридик ва жисмоний шахслар ҳамда ОАВга тарқатилаётган маълумотларнинг асослилигини текширишни тавсия қилган.
Изоҳ (0)