Samarqand viloyati Pastdarg‘om tumanida er xotinini o‘ldirib qo‘ydi, deya ma’lum qilmoqda “Xabar.uz”.
Qayd etilishicha, Pastdarg‘om tumanining “Zangiboy” mahallasida istiqomat qiluvchi fuqaro xotinini o‘ldirib qo‘ygan. Voqelik 22-oktabr kuni yuz bergani aytilmoqda.
Bosh prokuratura matbuot xizmati rahbari Hayot Shamsutdinov voqelik yuz berganini tasdiqladi. Uning aniqlik kiritishicha, 1991-yilda tug‘ilgan er 1996-yilda tug‘ilgan turmush o‘rtog‘ini kaltaklab emas, bo‘g‘ib o‘ldirib qo‘ygan.
So‘ng jinoyatini yashirish maqsadida go‘yoki ayoli o‘z joniga qasd qilganday taassurot uyg‘otishi uchun murdani yashash uyining qurilishi tugallanmagan qismiga olib kirib, arqondan yasalgan sirtmoqni bo‘yin qismiga bog‘lab qo‘ygan. Shundan so‘ng xotini o‘zini o‘zi osib qo‘ygani haqida IIBga xabar beradi.Biroq tuman prokuraturasi tergovga qadar surishtiruv o‘tkazish jarayonida asl voqelikni aniqladi. Shu tariqa unga nisbatan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilib, protsessual tartibda qo‘lga olindi.
Ayni paytda tergov harakatlari davom etmoqda.
Avvalroq Toshkentda xotinini bolasining axlatini yeyishga majbur qilgan erkak va Xorazmda oilaviy janjal oqibatida xotinini bo‘g‘ib o‘ldirib qo‘ygan erkak qo‘lga olingani xabar qilingandi.
Izoh (0)