Jurnalist Alisher Ro‘zioxunov ichki ishlar xodimlari uni sababsiz kaltaklaganini ma’lum qilib, o‘zining Telegram kanalida ichki ishlar vaziri Po‘lat Bobojonovga murojaat yo‘lladi.
23-oktabr kuni e’lon qilingan ushbu murojaat “Vazir Bobojonov, iltimos, iste’fo bering. Negaki sizning xodimlaringiz fuqarolarni haqoratlab, kaltaklashda davom etyapti. Siz tizimni o‘zgartira olmayapsiz”, so‘zlari bilan boshlangan.
Jurnalistning yozishicha, 23-oktabr kuni tungi vaqtda chorrahadan o‘tayotganida yo‘l harakati xodimi bir mashinani to‘xtatgan. “U yo‘l yoqasida turgan inspektor xizmat mashinasiga yonma-yon, yo‘lning ikkinchi yo‘lagiga to‘xtadi. Inspektor esa yo‘lning uchinchi yo‘lagidan haydovchi eshigi tomon yurib kelayotgandi. Men yo‘ldagi tirbandlik va vaziyatni ko‘rib, arang uchinchi va to‘rtinchi bo‘lak orasiga tushib qoldim. Shunday inspektorning qo‘li mashinamning o‘ng yon oynasiga tegib ketdi. Shu joydan qochmay, inspektor kelishini kutdim, unga yo‘l o‘rtasiga sal e’tibor bilan chiqishini aytganim bilan mojaro boshlandi”, — deydi Alisher Ro‘zioxunov.
Uning aytishicha, 6 dan ortiq xodim hamma ishini qo‘yib uni o‘rab olgan. “Inspektor hujjatlarimni talab qildi. Berdim. Shu orada qiy-chuv qilib, xodimlar ‘buni rasmiylashtir, odam urdi’ deb aql o‘rgata boshladi. Men sal shokka tushdim”, — deydi u.
Shu orada jurnalist shahar IIBBda kimni tanisa, qo‘ng‘iroq qilib, anglashilmovchilik bilan ishni jiddiylashtirayotganini tushuntirgan. “Inspektor telefonimni olib bir chetga o‘tib ketdi. Go‘shakni nariyog‘idagi odam vaziyatni uning og‘zidan eshitayotgandi. Shu paytdan niqobda, hech qanday tanish belgisi bo‘lmagan 2 nafar xodimning biri dubinka bilan qornimga soldi. Hech qanday sabab yo‘q. Aynan shu xodim mensimay, haqoratlab gaplasha boshladi. Buni tushunmadim, ammo vaziyat keskinlashib ketmasligi uchun xo‘p, aka deb turgandim. Shu xo‘p so‘zim ham yoqmadi shekilli. Dubinka zarbidan ikki bukilib yerga o‘tirdim. Qolganlar masxara qilishni boshladi. Aktyor ekan, tegma, hozir o‘ziga keladi, deb.
Inspektor telefonda suhbatni tugatib, qaytib keldi va men jurnalist ekanimni qolganlarga aytdi. 10 daqiqadan so‘ng atrofdagi xodimlari tumtaraqay bo‘ldi. Inspektor va zudlik bilan shu joyga yetib kelgan rahbari meni yupatib kechirim so‘radi. Men qabul qildim. Ammo gap ularda emasdi. Xullas, vazir janoblari, ikkiyuzlamachi, o‘zboshimcha va vakolatini suiiste’mol qilib, odam uradigan, haqoratlaydigan xodimlaringizni isloh qilolmayapsiz. Buni eplaydigan odamga o‘rningizni bo‘shatib bering”, — deydi Alisher Ro‘zioxunov va aybi bo‘lgan taqdirda inspektordan rasmiylashtirishni 5 marta so‘raganini aytgan.
Toshkent shahar IIBB Alisher Ro‘zioxunov bilan sodir bo‘lgan holat yuzasidan munosabat bildirdi. Unda Toshkent shahar IIBB tomonidan mazkur ma’lumot o‘rganib chiqilib, voqeada ishtirok etgan barcha xodimlarning hamda fuqaro Alisher Ro‘zioxunovning xatti-harakatlariga huquqiy baho berilishi aytilgan. IIBB, shuningdek, fuqarolardan, bloger va jurnalistlardan “o‘z mavqeyini ro‘kach qilib, ichki ishlar organlari xodimlarining ishlariga xalaqit bermasliklarini, ijtimoiy tarmoqlarda o‘zi bilan sodir bo‘lgan voqealarni buzib, ommaga namoyish qilmasliklarini” so‘ragan.
Bunga javoban esa jurnalist mazkur holatda IIB xodimlariga biror marta jurnalist ekanim ro‘kach qilmagani, ish joyini tilga olinmagani va o‘zimni oddiy haydovchi sifatida tutganini bildirgan. Shuningdek, “IIBB men bilan yuz bergan holat bo‘yicha barcha tomon harakatiga huquqiy baho beriladi, deb aytyapti-yu, avvaldan xulosani ham taqdim etyapti. Demak, men sodir bo‘lgan voqeani buzib talqin etganman?”, deb yozgan.
Ushbu holat bo‘yicha Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov va uning o‘rinbosari Saida Mirziyoyeva ham munosabat bildirdi.
“Kuni kecha jurnalist Alisher Ro‘zioxunov bilan bo‘lib o‘tgan holatdan biz xavotirdamiz. Jurnalist o‘z sahifasida yozgan gaplari rost bo‘lsa, uni haqiqatan ham ichki ishlar xodimlari dubinka bilan kaltaklagan bo‘lsa, biz ushbu holat yuzasidan xizmat tekshiruvi o‘tkazib, masalaga oydinlik kiritilishini, aybdorlarga nisbatan jazo chorasi qo‘llanilishini O‘zbekiston Respublikasi Ichki ishlar vazirligidan so‘raymiz. Jurnalist tomonidan qonun buzilgan taqdirda ham unga nisbatan qo‘l ko‘tarilishi mumkin emas. Va qonun barcha uchun barobar bo‘lishi kerak. Ushbu holatni biz diqqat bilan kuzatib boramiz”, — degan Komil Allamjonov.
“Albatta, qonun barcha uchun barobar bo‘lishi kerak. Xoh u oddiy fuqaro, yoki jurnalist bo‘lsin, lekin xizmat vazifasidagi xodimlar odamlarga qo‘l ko‘tarishiga qarshimiz. Jurnalistlarni biz har qanday holatda ham himoya qilamiz”, — deya munosabat bildirdi Saida Mirziyoyeva.
Izoh (0)