Janubiy Koreyada kamida 28 kishi grippga qarshi vaksinatsiya qilinganidan keyin vafot etgan. Bu haqda Koreya Respublikasi kasalliklar profilaktikasi va nazorati bo‘yicha milliy agentligiga tayanib, Yonhap xabar bergan.
Mamlakatda 16-oktabr – grippga qarshi ommaviy emlash ishlari boshlanganidan buyon 28 kishi vaksinatsiya oqibatida vafot etgan. Dastlabki o‘lim holati o‘tgan jumada Inchon shahrida qayd etilgan va u yerda 17 yoshli maktab o‘quvchisi vaksinatsiyadan keyin vafot etgan. Bu kabi holatlar Seulda, Kyongido provinsiyasida va boshqa hududlarda ham kuzatilgan.
Vafot etganlarning aksariyati keksa yoshdagi odamlar, shifokorlar ularning boshqa jiddiy kasalliklar bilan og‘riganini bildirgan.
Tekshiruv ushbu holatlarning kamida ikkitasi emlashdan keyingi noxush ta’sir sifatida yuzaga kelgan anafilaktik shok bilan bog‘liq ravishda yuz berganini ko‘rsatgan.
Koreya Respublikasi tibbiyot assosiatsiyasi vaziyat sabab vaksinatsiya qilish dasturini 29-oktabrgacha to‘xtatgan. Mutaxassislar tekshiruvlar davomida kamida oltita holatda gripp vaksinasining odamlar o‘limiga to‘g‘ridan to‘g‘ri ta’sir qilmaganini ta’kidlamoqda. Vaksinalar tarkibidan zaharli moddalar aniqlanmagan.
Mamlakatda emlash dasturi doirasida deyarli 13 million aholi vaksinatsiya qilingan. Dasturdan ko‘zlangan asosiy maqsad koronavirus pandemiyasi davrida sog‘liqni saqlash tizimini mavsumiy gripp bilan bog‘liq yuklamalardan xoli qilishdan iborat. Janubiy Koreyada qariyb 30 million aholini grippga qarshi emlash rejalashtirilgan, shundan 19 millioni bepul vaksinatsiya qilinadi.
Oktabr boshida O‘zbekistondagi o‘qituvchi va tibbiyot xodimlarini grippga qarshi emlash uchun Rossiyadan 1 million doza “Sovigripp” vaksinasi sotib olinishi xabar qilingandi.
Izoh (0)