Chexiya hukumati aksariyat chakana savdo do‘konlarini yopish va COVID-19 koronavirus infeksiyasining tarqalishini oldini olish maqsadida ayrim xizmatlarning ko‘rsatilishiga cheklovlar joriy etdi. Taxminlarga ko‘ra cheklovlar 3-noyabrgacha amal qilishi mumkin. Bu haqda “Interfaks” xabar qildi.
Bundan tashqari, hukumat fuqarolarga faqat o‘ta zarur holatlardagina ko‘chaga chiqishni tavsiya qilmoqda, jumladan, ishga borish yoki shifokor qabuliga kelish uchun uydan chiqishni so‘ramoqda. Oziq-ovqat do‘konlari va dorixonalarning faoliyati davom ettiriladi. Restoran va kafelar faqat yetkazib berish xizmati asosida faoliyat olib boradi.
Chexiya sog‘liqni saqlash vaziri Roman Primula sog‘liqni saqlash tizimining quvvati yaqin kunlar ichida tugashi mumkinligini bildirgan. Uning so‘zlariga ko‘ra tezkor choralar amalga oshirilmasa, noyabrda shifoxonalarda bemorlar uchun koykalar yetishmasligi kuzatilishi mumkin.
Chexiyada aholi soniga nisbatan koronavirus bilan kasallanish ko‘rsatkichi bo‘yicha Yevropada eng yomon holatdagi mamlakat. 20-oktabrda aholisi 10 million kishini tashkil qiluvchi Chexiyada 11984 ta yangi kasallanish holati qayd etilgan.
Bu Worldometer portali axboroti bo‘yicha 19-oktabrdagi natijadan 3 907 taga ko‘proq. Shuningdek, ma’lumotlarga ko‘ra mamlakatda bir sutka ichida 106 nafar bemor koronavirus infeksiyasi asoratlari oqibatida vafot etgan, bu oxirgi olti kun ichidagi eng yomon ko‘rsatkich.
Yevropada koronavirus pandemiyasining ikkinchi to‘lqini sabab qayta lokdaun e’lon qilgan birinchi davlat Irlandiya bo‘lgan. Irlandiyada odamlarga 21-oktabrdan 1-dekabrgacha zarurat bo‘lmagan holatlarda o‘z uylaridan 5 kilometr masofadan uzoqda bo‘lish taqiqlab qo‘yilgan.
Shuningdek, Sloveniya, Uels kabi davlatlarda ham koronavirus tarqalishining ikkinchi to‘lqini tufayli karantin cheklovlari qat’iylashgan.
Izoh (0)