Жанубий Кореяда камида 28 киши гриппга қарши вакцинация қилинганидан кейин вафот этган. Бу ҳақда Корея Республикаси касалликлар профилактикаси ва назорати бўйича миллий агентлигига таяниб, Yonhap хабар берган.
Мамлакатда 16 октябрь – гриппга қарши оммавий эмлаш ишлари бошланганидан буён 28 киши вакцинация оқибатида вафот этган. Дастлабки ўлим ҳолати ўтган жумада Инчон шаҳрида қайд этилган ва у ерда 17 ёшли мактаб ўқувчиси вакцинациядан кейин вафот этган. Бу каби ҳолатлар Сеулда, Кёнгидо провинциясида ва бошқа ҳудудларда ҳам кузатилган.
Вафот этганларнинг аксарияти кекса ёшдаги одамлар, шифокорлар уларнинг бошқа жиддий касалликлар билан оғриганини билдирган.
Текширув ушбу ҳолатларнинг камида иккитаси эмлашдан кейинги нохуш таъсир сифатида юзага келган анафилактик шок билан боғлиқ равишда юз берганини кўрсатган.
Корея Республикаси тиббиёт ассосиацияси вазият сабаб вакцинация қилиш дастурини 29 октябргача тўхтатган. Мутахассислар текширувлар давомида камида олтита ҳолатда грипп вакцинасининг одамлар ўлимига тўғридан-тўғри таъсир қилмаганини таъкидламоқда. Вакциналар таркибидан заҳарли моддалар аниқланмаган.
Мамлакатда эмлаш дастури доирасида деярли 13 миллион аҳоли вакцинация қилинган. Дастурдан кўзланган асосий мақсад коронавирус пандемияси даврида соғлиқни сақлаш тизимини мавсумий грипп билан боғлиқ юкламалардан холи қилишдан иборат. Жанубий Кореяда қарийб 30 миллион аҳолини гриппга қарши эмлаш режалаштирилган, шундан 19 миллиони бепул вакцинация қилинади.
Октябрь бошида Ўзбекистондаги ўқитувчи ва тиббиёт ходимларини гриппга қарши эмлаш учун Россиядан 1 миллион доза «Совигрипп» вакцинаси сотиб олиниши хабар қилинганди.
Изоҳ (0)