Armaniston bosh vaziri Nikol Pashinyan mamlakat aholisiga qilgan murojaatida xalqni qo‘lga qurol olib vatanni himoya qilishga chaqirdi. Bu haqda “RIA Novosti” xabar berdi.
“Asosiy maqsadimiz oxirigacha kurashish va xalqimiz manfaatlarini himoya qilishdan iborat. Bugun Ozarbayjon egallab turgan pozitsiya birinchi navbatda qo‘lga qurol olish va vatanni himoya qilishni taqozo etmoqda”, — deya Pashinyan so‘zlarini keltirgan “Sputnik Armaniston”.
Mamlakat bosh vaziri Qorabog‘dagilar Stepanakertga qaytishi va mahalliy armiya safiga qo‘shilishi lozimligini qo‘shimcha qilgan. Shuningdek, Pashinyan mahalliy boshqaruv organlari, davlat boshqaruvi organlari, partiyalar va jamoat tashkilotlarini Bosh shtab rahbarligidagi ko‘ngillilar guruhlarini tashkil qilishga chaqirgan.
Pashinyan Boku nizoning bunday yo‘l bilan hal etilishiga rozi emas, Qorabog‘ ozod qilinishi lozimligi, Armaniston ushbu hududsiz mavjud bo‘la olmasligini ta’kidlagan. Uning so‘zlariga ko‘ra Qorabog‘ xalqining himoyasi butun arman millatining muhofazasidir.
U masala diplomatik yo‘l bilan hal etilmaguniga qadar qo‘lga qurol olib o‘z huquqlarini himoya qilishga tayyor turish lozimligini qayd etgan.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Izoh (0)