Polsha, Xorvatiya va Sloveniyada 21-oktabr kuni Sog‘liqni saqlash vazirliklari COVID-19 koronavirus infeksiyasi bilan kasallanish holatlari bo‘yicha sutkalik ko‘rsatkichlar yomonlashgani, antirekordlar yangilanganini xabar qildi, deb yozmoqda “Korrespondent.net”.
Polshada oxirgi bir sutkada 10 040 ta yangi kasallanish holati qayd etildi va bu esa yangi antirekord hisoblanadi. Kasallik asoratlari oqibatida bir sutka davomida 130 nafar bemor vafot etgan.
Polshada pandemiya boshlanganidan buyon koronavirus infeksiyasini yuqtirib olganlar soni 202 579 nafarga yetgan. 3851 kishi kasallik asoratlari oqibatida hayotdan ko‘z yumgan. 100 ming nafarga yaqin bemor infeksiyadan tuzalgan.
Mamlakat kasalxonalarida 9439 nafar bemor koronavirus infeksiyasidan davolanmoqda, shundan 757 nafari o‘pkaga sun’iy havo yetkazib beruvchi maxsus apparatlarga ulangan.
Sloveniyada esa oxirgi bir sutka ichida yangi antirekord o‘rnatildi – 1503 ta yangi kasallanish holati aniqlandi. Faol holatlar soni (koronavirusdan davolanishda davom etayotgan bemorlar) esa 8860 tani tashkil qilmoqda. Shundan 333 nafar bemor kasalxonalar, 55 nafari jonlantirish bo‘limlarida davolanmoqda. Sakkiz nafar bemor oxirgi bir sutka ichida COVID-19 koronavirus infeksiyasining asoratlari oqibatida vafot etgan, mamlakat bo‘yicha kasallik asoratlari oqibatida qayd etilgan o‘limlar soni 200 tadan oshib ketgan.
Xorvatiyada 1424 ta yangi kasallanish holatlari kuzatildi. Bu pandemiya boshidan beri mamlakatda kuzatilgan yangi antirekord.
Xorvatiyada kasallik qayd etilgan fuqarolar soni 6459 nafarni tashkil qilmoqda. Shundan 622 nafari kasalxonalarda, 38 nafari esa o‘pkaga sun’iy tarzda havo yetkazib beruvchi apparatlarga ulangan. Bir sutka ichida jami 11 kishi kasallik asoratlari oqibatida hayotdan ko‘z yumgan.
Eslatib o‘tamiz, avval Bolgariyada COVID-19 bo‘yicha vaziyat og‘irlashgani tufayli fuqarolarning ko‘chada tibbiy niqob taqqan holda yurishi majburiy etib belgilangandi. Shuningdek, Sloveniyada hukumat mamlakat miqyosida epidemiya boshlanganini e’lon qilgani, hududlar bo‘ylab harakatlanish cheklangani va tungi vaqtlarda komendantlik soati joriy etilgani haqida xabar berilgandi.
Izoh (0)