Qirg‘iziston parlamenti prezidentlik saylovlarini qachon o‘tkazish borasida qaror chiqara olmadi. Bu haqda “RIA Novosti” xabar qildi.
Tilek To‘xtagaziyev qishloq xo‘jaligi vaziri lavozimiga tayinlanganidan keyin deputatlarning ko‘pchiligi majlis zalini tark etishni boshlagan. Palata saylovning o‘tkazilish sanasini muhokama qilishni boshlaganida zalda 27 nafar xalq deputatlari qolgan, yig‘ilish boshlanganida xalq vakillarining soni 80 nafar bo‘lgan. Yakuniy qaror chiqarilishi uchun kamida 61 nafar xalq vakili majlisda ishtirok etishi talab etiladi.
Zalda qolgan deputatlar prezidentlik saylovlarini o‘tkazish sanasi muhokamasini 22-oktabrga qoldirishni taklif etdi. Xalq deputati Omurbek Tekebayevning qayd etishicha, agar Qonunchilik majlisi chorshanba kuni yarim tungacha prezidentlik saylovlarini o‘tkazish sanasini belgilamasa, u holda MSK avtomatik tarzda saylovlarga tayyorgarlik boshlab yuborishi mumkin.
5-oktabrda Qirg‘izistonda parlament saylovlarining natijalariga nisbatan xalqning ommaviy norozilik namoyishlari boshlangan. Namoyishchilarning kuchishlatar tizim vakillari bilan to‘qnashuvidan keyin norozilik bildirayotgan olomon prezident administratsiyasi joylashgan parlament binosini egallagan. To‘qnashuvlar oqibatida 1,2 ming nafar kishi talafot ko‘rgan va bir nafar fuqaro halok bo‘lgan. Bosh vazir Qubatbek Bo‘ronov iste’fo berdi. Qirg‘iziston prezidenti So‘ronbay Jeenbekovning matbuot kotibi uning Bishkekda ekani va hammasini nazorati ostida ushlab turganini ma’lum qildi.
9-oktabrda Bishkekda xalqning norozilik namoyishlari qayta boshlandi. Markaziy maydonda bosh vazir Sadir Japarovning tarafdorlar va muxolifat vakillari o‘rtasida to‘qnashuv kuzatildi. Oqibatda 7 nafar odam, jumladan, muxolifat yetakchisi Tilek To‘xtagaziyev jarohat oldi.
15-oktabr kuni So‘ronbay Jeenbekov Qirg‘iziston prezidentligi lavozimidan iste’fo berganini e’lon qildi. U bosh vazir Sadir Japarov va boshqa siyosatchilardan o‘z tarafdorlarini poytaxtdan olib chiqib ketishni so‘ragan va ulardan bishkekliklar tinchligini buzmaslikni iltimos qilgan. 16-oktabr kuni parlament majlisida qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.
21-oktabr kuni Jo‘qorg‘i Kenesh (Qirg‘iziston parlamenti)ga qayta saylovlar 2020-yil 20-dekabrda bo‘lib o‘tishi, tegishli qarorni mamlakat Markaziy saylov komissiyasi 21-oktabr kuni qabul qilgani haqida xabar berildi.
Izoh (0)