“Iyul oyida 28 ming kishi vafot etgan”. Qozog‘istonda 2020-yil davomida o‘lim holatlariga bog‘liq statistika qay tartibda o‘zgardi?

Qozog‘istonda aholi o‘rtasidagi o‘lim statistikasi sezilarli o‘zgarishlarga uchradi. Tengrinews mamlakat Milliy iqtisodiyot vazirligining Statistika qo‘mitasi tomonidan tayyorlangan qiziqarli raqamlarga e’tibor qaratdi.

Idora ma’lumotlarga ko‘ra, 2019-yilda Qozog‘istonda har oy 10-12 ming kishi vafot etgan. Ushbu ko‘rsatkichlar, ayniqsa, yanvar va iyul oyida eng yuqoriga chiqqan. Eng kam o‘lim holatlari esa iyun oyida qayd etilgan.

Qozog‘istonda 2019-yil davomida vafot etganlar soni:

• yanvar — 12 403;
• fevral — 10 768;
• mart — 10 582;
• aprel — 11 617;
• may — 11 183;
• iyun — 10 061;
• iyul — 12 420;
• avgust — 10 477;
• sentabr — 10 535;
• oktabr — 11 680;
• noyabr — 10 386;
• dekabr — 11 378.

2020-yil ma’lumotlariga ko‘ra, o‘lim holati o‘tgan yilning dastlabki ikki oyi darajasida saqlanib qolgan. Mart va aprel oyida qayd etilgan o‘limlar soni 30-60 foizga keskin tushib ketgan. Biroq may—iyun oyida raqamlar 14 mingga qadar ko‘tarilgan, iyulda esa ikki barobarga oshgan — 28 ming. Avgustda ham o‘lim holatlarida pasayish kuzatilgan. Sentabr oyi uchun ma’lumotlar esa hali e’lon qilinmagan.

Qozog‘istonda 2020-yil davomida vafot etganlar soni:

• yanvar — 11 867;
• fevral — 10 842;
• mart — 8 511;
• aprel — 4 441;
• may — 14 358;
• iyun — 14 949;
• iyul — 28 178;
• avgust — 17 835.

Eslatib o‘tamiz, 2020-yilning bahoridan Qozog‘istonda koronavirus infeksiyasi bilan ommaviy kasallanish holatlari qayd etila boshladi. Dastlabki holat 13-mart kuni mamlakatning ikki fuqarosida aniqlangan. Keyinroq Qozog‘iston favqulodda holat rejimini e’lon qilib, butun viloyatlarda karantin e’lon qildi.

Avvalroq Qozog‘iston poytaxti Nur-Sultonda aholi orasida COVID-19 kasalligi tarqalishi ortib borayotganligi tufayli 14-oktabrdan boshlab yangi cheklov va karantin choralari joriy etilgani haqida xabar berilgandi.