Tehron qurol-yarog‘ga qo‘yilgan embargo bekor qilinganidan so‘ng, asosan, qurol xarid qilish emas, balki sotish bilan shug‘ullanishni rejalashtirmoqda. Bu haqda Eron mudofaa vaziri Amir Hotamiyning IRINN telekanalidagi chiqishiga tayanib, “Korrespondent.net” xabar berdi.
“Biz import qilinganidan ko‘ra ko‘proq qurol eksport qilishimizga shubha yo‘q”, — deydi Eron mudofaa vaziri o‘z chiqishida.
Uning ta’kidlashicha, “o‘tgan yili qurollanish eksporti va importi bo‘yicha Tehronga bir necha mamlakat murojaat qilgan va ular bilan muzokaralar o‘tkazilgan”.
Shuningdek, vazirning so‘zlariga ko‘ra, Eronning harbiy sohadagi yutuqlariga qaramay, mamlakat hamon sanksiyalar ostida qolmoqda. Hotamiyning qayd etishicha, Eron “raketa yetakchiligi” bo‘yicha o‘ziga e’tiborni tortadi, shuningdek, u uchuvchisiz boshqariladigan uchish qurilmalarini yaratishda dunyo bo‘yicha “kuchli beshlikka” kiradi.
“Biz sifatli va raqiblarimizga nisbatan arzonroq narxdagi qurilmalarni ishlab chiqaramiz”, — deydi mudofaa vaziri.
Uning so‘zlariga ko‘ra, Eron ushbu qurollarni ulardan faqatgina qonuniy yo‘l bilan o‘zini o‘zi himoyalashda foydalanadigan davlatlarga sotadi.
Eslatib o‘tamiz, Eronning qurol yetkazib berishi va eksportiga qo‘yilgan embargo 18-oktabr kuni o‘z kuchini yo‘qotgan. Xuddi shu kuni Eron yadro dasturi atrofidagi vaziyatni hal qilish bo‘yicha keng qamrovli Qo‘shma xatti-harakatlar rejasi kuchga kirganiga besh yil to‘lgan.
2015-yilda Buyuk Britaniya, Germaniya, Xitoy, Rossiya, AQSh, Fransiya va Eron Tehronning atom sohasidagi majburiyatlariga qo‘yilgan sanksiyalarni bemor qiluvchi keng qamrovli Qo‘shma xatti-harakatlar rejasini ma’qullagan edi. O‘sha yilning o‘zida BMT Xavfsizlik kengashi 2020-yil 18-oktabrida qurol embargosining tugashini belgilovchi 2231-sonli rezolyutsiyani qabul qilgandi.
Izoh (0)