Sergey Sobyanin o‘zining blogi orqali Moskva shahri rasmiylari koronavirus tarqalishiga qarshi qanday kurashmoqchi ekanligi to‘g‘risidagi savollarga javob qaytardi.
Sobyanin yana bir bor koronavirus bilan yangi kasallanish holati ortayotganiga qaramay, meriya komendantlik soati, shahar bo‘ylab harakatni to‘liq taqiqlash, kirish va chiqishni to‘xtatish, deyarli barcha korxonalarni yopish kabi keskin choralarni qo‘llashga tayyor emasligini ta’kidlagan. Sobyanin bu kabi cheklovlarni “mutlaqo imkonsiz va nomaqbul” deb atagan.
Moskva merining fikricha, optimal strategiya shaharni yopish va cheklovchi choralardan to‘liq voz kechish o‘rtasidagi oraliq yo‘lni topishdan iborat.
Ushbu strategiya doirasida 65 yoshdan katta bo‘lgan insonlar, surunkali kasalligi bor fuqarolar, yuqori sinf o‘quvchilari, ayrim talabalar uchun cheklov kiritilgan, ba’zi korxonalar o‘z xodimlarini masofadan turib ishlatishga o‘tgan. Sobyaninning so‘zlariga ko‘ra, jami 6,5 million kishi, ya’ni Moskvaning 50 foiz aholisi uyda qolmoqda yoki kasallanish xavfisiz ishga qatnamoqda.
Shu bilan birga, Sobyanin Moskvada COVID-19 bilan yangi kasallanish holatlari ortayotganiga izoh berishga uringan. Merning yozishicha, bu shaharda “Rossiyaning boshqa viloyatiga qaraganda 10 barobar ko‘proq odam” istiqomat qilishi va virusni aniqlash bo‘yicha testlar ko‘p o‘tkazilayotgani bilan bog‘liq.
Shuningdek, u Moskva koronavirus bilan kasallanish holatlari bo‘yicha Rossiyada birinchi o‘rinda ketayotgani, biroq bemorlarning shifoxonaga yotqizilishi va koronavirus pnevmoniyasi bo‘yicha 30—40-o‘rinlarda ekanligini aytgan. “Shunga qaramay, bu bizni tinchlantirmayapti”, — deya qo‘shimcha qiladi Moskva meri.
19-oktabr ma’lumotlariga ko‘ra, Moskvada pandemiya boshlanganidan buyon koronavirusga chalingan 6009 kishi vafot etgan. Hozirga qadar Rossiya poytaxtida 362 mingdan ortiq odamda COVID-19 tasdiqlangan.
Izoh (0)