Gretsiya Turkiya bilan quruqlikdagi chegarasi Evros viloyatida Yevroittifoq hududlari chegaralarini mustahkamlash uchun devor quradi. Bu haqda Gretsiya hukumatining rasmiy vakili Stelios Petsas ma’lum qilgan, deb yozmoqda “Korrespondent.net”.
“Ayni vaqtda chegarada 26 kilometr uzunlikdagi yangi to‘siq o‘rnatilmoqda va 10 kilometr uzunlikdagi eski uchastkalar qayta ta’mirlanmoqda. Yangi devorning qurilishi mamlakatning suveren huquqlari himoyasiga xizmat qiladi va Gretsiyaning Yevropa tashqi chegaralarini muhofaza qilishga tayyorligini ifodalovchi o‘ziga xos ishora bo‘ladi”, — degan Petsas.
Shuningdek, hukumat vakili bosh vazir Kiriakos Mitsotakisning Evrosga borib, holatni ko‘zdan kechirganini eslatgan.
“So‘nggi kunlarda bosh vazir chegaralarning samarali himoya qilinishini ta’minlash, chekka hududlarda yashovchi aholini qo‘llab-quvvatlash maqsadida Evrosda bo‘ldi. U mahalliy hokimlik organlarining vakillari bilan uchrashdi va 2021-yil aprel oyida qurib bitkaziladigan devor haqida qo‘shimcha ma’lumotlarga ega bo‘ldi”, – degan Petsas.
Gretsiya hukumati vakili devorning asosiy himoya funksiyasidan tashqari yana qo‘shimcha imkoniyatlar berishi haqida ham gapirgan, devorning sel va suv toshqinlari vaqtida ham asqatishi, Evrosning geomorfologiyasiga ham munosib ekani, boshqa tomondan olib qaraganda esa, qishloq xo‘jaligi mahsulotlarini yetishtirishda ham qo‘l kelishini eslatgan.Shuningdek, u Evrosdagi chegaralarni qo‘riqlashga 400 nafar yangi, doimiy chegarachi qo‘shilishi, yana 800 nafar askar Egey dengizining sharqiy qismiga jalb qilinishi, 480 nafar chegarachi esa mamlakatning qolgan qismida bo‘lishini qo‘shimcha qilgan.
“Bir yil davomida jami 1680 nafar chegarachi kuchaytirilgan politsiyaning bo‘lishi taqozo etiladigan hududlarga jalb etiladi”, – degan Petsas.
Izoh (0)