Birlashgan Arab Amirliklari Misrdan G‘azo janubigacha suv quvuri yotqizadi. Dengizdan olingan ob-hayot avvaliga filtrlanib, anklav aholisiga ichimlik suvi sifatida yetkazib beriladi.
Ma’lum qilinishicha, BAA texnik jamoalari loyiha uchun zarur jihozlarni allaqachon olib kela boshlagan. Uzunligi qariyb 7 kilometrni tashkil etadigan quvur G‘azo sohilidagi Al-Mavasi hududigacha boradi. Bu esa har kuni 600 mingga yaqin falastinlikni ichimlik suvi bilan ta’minlash imkonini beradi.
Bundan tashqari, BAA suv tanqisligini yumshatish uchun bir necha artezian quduqlarini burg‘ulash va yopilib qolganlarini tiklash tashabbusini ham ilgari surgan.
Shu bilan bir vaqtda, G‘azoda gumanitar vaziyat og‘irligicha qolmoqda. Anklavda yashovchi 2,4 million aholining ichimlik suv ta’minoti keskin cheklangan. Falastin Suv idorasi hisob-kitobiga ko‘ra, infratuzilmaning 80 foizdan ortig‘i zarar ko‘rgan. Yahudiy davlati ta’minotni to‘xtatganidan so‘ng, ko‘pchilik aholi sho‘r quduqlar yoki cheklangan miqdordagi gumanitar yordamga qaram bo‘lib qolgan.
BMT bosh kotibi Antoniu Guterrish masalaga e’tibor qaratib, shunday dedi:
“Yordamning hozirgi tomchilari okeanga aylanishi kerak”, deya xalqaro hamjamiyatni gumanitar vaziyatni yaxshilash uchun qat’iyroq harakat qilishga undadi.
Mutaxassislarning ogohlantirishicha, G‘azoda ocharchilikning “eng og‘ir ssenariysi” allaqachon boshlanib bo‘lgan va buni faqat tezkor choralar to‘xtatishi mumkin.
Izoh (0)