«Июль ойида 28 минг киши вафот этган». Қозоғистонда 2020 йил давомида ўлим ҳолатларига боғлиқ статистика қай тартибда ўзгарди?

Қозоғистонда аҳоли ўртасидаги ўлим статистикаси сезиларли ўзгаришларга учради. Tengrinews мамлакат Миллий иқтисодиёт вазирлигининг Статистика қўмитаси томонидан тайёрланган қизиқарли рақамларга эътибор қаратди.

Идора маълумотларга кўра, 2019 йилда Қозоғистонда ҳар ой 10-12 минг киши вафот этган. Ушбу кўрсаткичлар, айниқса, январь ва июль ойида энг юқорига чиққан. Энг кам ўлим ҳолатлари эса июнь ойида қайд этилган.

Қозоғистонда 2019 йил давомида вафот этганлар сони:

• январь — 12 403;
• февраль — 10 768;
• март — 10 582;
• апрель — 11 617;
• май — 11 183;
• июнь — 10 061;
• июль — 12 420;
• август — 10 477;
• сентябрь — 10 535;
• октябрь — 11 680;
• ноябрь — 10 386;
• декабрь — 11 378.

2020 йил маълумотларига кўра, ўлим ҳолати ўтган йилнинг дастлабки икки ойи даражасида сақланиб қолган. Март ва апрель ойида қайд этилган ўлимлар сони 30-60 фоизга кескин тушиб кетган. Бироқ май—июнь ойида рақамлар 14 мингга қадар кўтарилган, июлда эса икки баробарга ошган — 28 минг. Августда ҳам ўлим ҳолатларида пасайиш кузатилган. Сентябрь ойи учун маълумотлар эса ҳали эълон қилинмаган.

Қозоғистонда 2020 йил давомида вафот этганлар сони:

• январь — 11 867;
• февраль — 10 842;
• март — 8 511;
• апрель — 4 441;
• май — 14 358;
• июнь — 14 949;
• июль — 28 178;
• август — 17 835.

Эслатиб ўтамиз, 2020 йилнинг баҳоридан Қозоғистонда коронавирус инфекцияси билан оммавий касалланиш ҳолатлари қайд этила бошлади. Дастлабки ҳолат 13 март куни мамлакатнинг икки фуқаросида аниқланган. Кейинроқ Қозоғистон фавқулодда ҳолат режимини эълон қилиб, бутун вилоятларда карантин эълон қилди.

Аввалроқ Қозоғистон пойтахти Нур-Султонда аҳоли орасида COVID-19 касаллиги тарқалиши ортиб бораётганлиги туфайли 14 октябрдан бошлаб янги чеклов ва карантин чоралари жорий этилгани ҳақида хабар берилганди.