O‘zbekiston Qahramoni, arxeolog G‘ayratdin Xo‘janiyozov vafot etdi, deya xabar bermoqda O‘zbekiston Fanlar akademiyasi.
Ma’lumot uchun, G‘ayratdin Xo‘janiyozov 1948-yili Qorao‘zak tumanida tug‘ilgan. 1972-yili O‘zbekiston Fanlar akademiyasi Qoraqalpog‘iston filialining N.Davqorayev nomidagi Tarix, til va adabiyot institutining arxeologiya bo‘limiga ishga kirgan. Keyinchalik Moskva davlat universitetida, Moskvadagi Fanlar akademiyasining Arxeologiya institutida tajriba orttirgan.
Olim 1994-yildan boshlab O‘zbekiston Fanlar akademiyasi Qoraqalpog‘iston bo‘limi tasarrufida yangi ochilgan Tarix, arxeologiya va etnografiya institutining arxeologiya bo‘limida dastlab ilmiy xodim, so‘ngra bo‘lim boshlig‘i lavozimlarida ishlagan.
U shu kunga qadar FA Qoraqalpog‘iston bo‘limi Gumanitar fanlar ilmiy-tadqiqot institutining arxeologiya bo‘limi mudiri lavozimida faoliyat yuritib kelayotgan edi.
Arxeolog Qoraqalpog‘istondagi ko‘plab tarixiy hududlardagi arxeologik yodgorliklarida ilmiy-tadqiqot ishlarini olib borgan va ekspeditsiyalarga rahbarlik qilgan.
G‘.Xo‘janiyozovning ilmiy mehnat faoliyati davlat tomonidan munosib baholangan, 2003-yilda “Mehnat shuhrati” ordeni bilan mukofotlangan bo‘lsa, 2008-yili “O‘zbekiston Qahramoni” unvoniga sazovor bo‘lgan, 2014-yilda Qoraqalpog‘iston Jo‘qorg‘i Kengesiga deputat, 2015-yilda esa O‘zbekiston Senati a’zosi etib saylangan.
Fanlar akademiyasi O‘zbekiston Qahramoni, taniqli arxeolog G‘ayratdin Xo‘janiyozov vafoti munosabati bilan marhumning oila a’zolari va yaqinlariga chuqur hamdardlik bildirgan.
Avvalroq akademik Shavkat Akmalxonov 87 yoshida, akademik Tursunboy Rashidov 86 yoshida va akademik To‘ra Mirzayev vafot etgani haqida xabar berilgan edi.
Izoh (0)