O‘zbekiston Fanlar akademiyasining akademigi, O‘zbekistonda xizmat ko‘rsatgan fan arbobi, filologiya fanlari doktori, professor, O‘zbekiston Yozuvchilar uyushmasi a’zosi To‘ra Mirzayev 2020-yil 29-sentabr kuni vafot etdi. Bu haqda O‘zbekiston Yozuvchilar uyushmasi xabar qildi.
Foto: “Natlib.uz”
Ma’lumot o‘rnida, To‘ra Mirzayev 1936-yil 6-martda Buxoro viloyatining Shofirkon tumanida tug‘ilgan. U o‘zbek filologiyasining atoqli namoyandalaridan biri, xalq og‘zaki badiiy ijodiyotini keng ko‘lamda tadqiq etishdan iborat fundamental ilmiy maktabga asos solgan ulkan fan tashkilotchisi, eposshunoslikning ko‘plab nazariy masalalarini jahonshumul darajada hal qilgan yirik folklorshunos olim edi.
To‘ra Mirzayevning 600 dan ortiq ilmiy, uslubiy, ilmiy-ommabop ishi e’lon qilingan. Ulardan 5 tasi monografiya, 5 tasi darslik va o‘quv qo‘llanma, 45 tasi kitob va folklor to‘plamdir.
Olimning kitob va maqolalari Rossiya, Germaniya, Turkiya, Tojikiston, Qozog‘iston, Turkmaniston kabi ko‘plab mamlakatlarda nashr etilgan.
O‘zbekiston Yozuvchilar uyushmasi va Ijod jamoat fondi jamoasi marhumning oila a’zolari va yaqinlariga hamdardlik bildirgan.
