Andijonda avtomobilida YTH sodir qilgan IIB xodimi ikki kishi tomonidan kaltaklagan, holat yuzasidan jinoiy ish ochilib, ular qidiruvga berilgandi. “Xabar.uz”ning yozishicha, mazkur jinoyat ishi bo‘yicha qo‘shimcha ma’lumotlar paydo bo‘ldi.
Voqea 24-sentabr kuni sodir bo‘lgan, Andijon shahar IIO FMB 1-sonli IIB tergov bo‘linmasi tergovchisi S.G‘. Damas’ni haydab ketayotib boshqaruvini yo‘qotgan va yo‘l chetidagi Spark’ga to‘qnashgan. Bunga javoban Spark’da bo‘lgan X.B. (haydovchi) va uning yonidagi X.E. IIB kapitani S.G‘. bilan janjallashib, unga tan jarohati yetkazgan. Holat yuzasidan voqea ishtirokchilariga yetkazilgan tan jarohatlari, xususiyatlari va og‘irlik darajasini aniqlash yuzasidan sud-tibbiy ekspertizasi tayinlangan.
Xabarda aytilishicha, tergovga kelishdan bo‘yin tovlagani uchun qidiruvga berilganlardan biri X. E. topildi. U koronavirus yuqtirib davolanayotganligi sababli tergovga kela olmagan. Uning kasallikdan keyingi holati va oila a’zolari tomonidan 30 million so‘m garovga qo‘yganidan kelib chiqib, qamoqqa olish ehtiyot chorasi garovga o‘zgartirilgan.
Shuningdek, jabrlanuvchiga nisbatan tayinlangan sud-tibbiy ekspertizasining xulosasi ma’lum bo‘ldi. Qayd etilishicha, IIB kapitanida bosh miya yopiq shikasti, bosh miya chayqalishi, chap tomon g‘alvirsimon suyak katakchalarining yopiq sinishi, burun to‘sig‘ining travmatik qiyshayishi, chap ko‘z qovoqlari qontalashi, teri osti gematomasi, chap ko‘z olmasi 2-darajali kontuziyasi, chap chakka sohasi shilingan jarohatlari aniqlangan bo‘lib, mazkur tan jarohatlari hayot uchun xavflilik darajasiga ko‘ra, o‘rtacha og‘ir tan jarohatlari turkumiga kiradi.
Izoh (0)