Sirdaryo viloyati hokimi G‘ofurjon Mirzayev Sardoba suv ombori yorilishi oqibatida yuz bergan toshqin sababli uysiz qolgan fuqarolar uy ololmasa, kimga murojaat qilishi kerakligini ma’lum qildi, deb yozmoqda “Kun.uz”.
“Bu masala bo‘yicha aniq strategiyaga egamiz. Bu uylardan tashqari, eski kolxoz idoralari, mashina-traktor parklari bo‘lgan uylarni ta’mirlab, 60 ga yaqin xonadonni ta’minlaydigan bir xonali uy qilib ta’mirladik. Bu — zaxira”, — deya ma’lum qilgan hokim.
Uning so‘zlariga ko‘ra, 38 ta ikki qavatli uy talafot ko‘rgan edi. Prezident topshirig‘iga ko‘ra, bu uylar ham yangi uylardan qolishmaydigan qilib ta’mirlanmoqda. Shuningdek, bir paytlar bir qavatli yotoqxona shaklda qurilgan uylar ham ta’mirlanmoqda.
“Har bir tuman hokimligida uylarni egalariga berish bo‘yicha komissiyalar ishlayapti. Ana shu komissiyalarga murojaat qilinsa, o‘rganib chiqamiz va albatta uy bilan ta’minlaymiz”, — deya ta’kidlagan G‘ofurjon Mirzayev.
Avvalroq Demokratiya va inson huquqlari instituti direktori Sayyora Xo‘jayeva Oqoltin tumani Beshyuz qishlog‘ida Sardoba fojiasining chaylalarda yashayotgan jabrlanuvchilari aks etgan suratlarni e’lon qilgandi. Tuman hokimligi mazkur holat bo‘yicha izoh bergandi.Shuningdek, toshqindan keyin evakuatsiya qilingan fuqarolarning 2 mingdan ortig‘i hamon Jizzax viloyati hududida yashayotgani ma’lum bo‘ldi.
Mavzuga doir: Sardoba suv ombori taqdiri haqida ma’lumot berildi
Izoh (0)