Sirdaryo viloyati hokimligi matbuot xizmati Sardoba suv omboridagi texnogen vaziyat oqibatlarini bartaraf etish choralarining tezkor nazorati xususida ma’lumot taqdim etdi, deya xabar qilmoqda “Kun.uz”.

Foto: “Gazeta.uz” / Nikita Makarenko

May oyida Sardoba suv omboridagi texnogen ofat oqibatida Sirdaryo viloyatining Sardoba, Mirzaobod va Oqoltin tumanlaridagi 11 ta mahallada (28 ta aholi punkti) yashovchi 89 ming 450 nafar aholi xavfsiz hududlarga evakuatsiya qilingandi.

Ma’lum qilinishicha, bugungi kunga qadar 80 ming 64 nafar (89,5 foiz) aholi yashash manzillariga qaytarilgan, qolgan 9386 nafari evakuatsiya qilingan joylarida yashamoqda.

Shundan Sirdaryo viloyatining tuman-shaharlarida – 7308 nafar (919 nafari 10 ta muassasalarda va 6389 nafari xonadonlarda), Jizzax viloyatining tuman-shaharlarida – 2078 nafar aholi xonadonlarda yashamoqda.

Eslatib o‘tamiz, 2020-yil 1-may kuni tongida Sirdaryo viloyatidagi Sardoba suv omborida to‘g‘on o‘pirilishi sodir bo‘lgandi. Suv toshqini oqibatida Sardoba, Oqoltin va Mirzaobod tumanlaridagi aholi punktlari va ekinlarga zarar yetgan, binolar, yo‘llar, kommunikatsiyalar vayron bo‘lgan. Uchta tumandan jami 90 mingga yaqin kishi evakuatsiya qilingan.

Bu ish bo‘yicha 17 nafar shaxs hibsda ekani ma’lum qilingan.

Avvalroq Sardoba fojiasining chaylalarda yashayotgan jabrlanuvchilari haqida xabar qilingandi.