Сирдарё вилояти ҳокими Ғофуржон Мирзаев Сардоба сув омбори ёрилиши оқибатида юз берган тошқин сабабли уйсиз қолган фуқаролар уй ололмаса, кимга мурожаат қилиши кераклигини маълум қилди, деб ёзмоқда «Kun.uz».
«Бу масала бўйича аниқ стратегияга эгамиз. Бу уйлардан ташқари, эски колхоз идоралари, машина-трактор парклари бўлган уйларни таъмирлаб, 60 га яқин хонадонни таъминлайдиган бир хонали уй қилиб таъмирладик. Бу — захира», — дея маълум қилган ҳоким.
Унинг сўзларига кўра, 38 та икки қаватли уй талафот кўрган эди. Президент топшириғига кўра, бу уйлар ҳам янги уйлардан қолишмайдиган қилиб таъмирланмоқда. Шунингдек, бир пайтлар бир қаватли ётоқхона шаклда қурилган уйлар ҳам таъмирланмоқда.
«Ҳар бир туман ҳокимлигида уйларни эгаларига бериш бўйича комиссиялар ишлаяпти. Ана шу комиссияларга мурожаат қилинса, ўрганиб чиқамиз ва албатта уй билан таъминлаймиз», — дея таъкидлаган Ғофуржон Мирзаев.
Аввалроқ Демократия ва инсон ҳуқуқлари институти директори Сайёра Хўжаева Оқолтин тумани Бешюз қишлоғида Сардоба фожиасининг чайлаларда яшаётган жабрланувчилари акс этган суратларни эълон қилганди. Туман ҳокимлиги мазкур ҳолат бўйича изоҳ берганди.Шунингдек, тошқиндан кейин эвакуация қилинган фуқароларнинг 2 мингдан ортиғи ҳамон Жиззах вилояти ҳудудида яшаётгани маълум бўлди.
Мавзуга доир: Сардоба сув омбори тақдири ҳақида маълумот берилди
Изоҳ (0)