Yuridik va jismoniy shaxslarga valyuta ayirboshlash shoxobchalarini ochishga ruxsat berish taklif etilmoqda. Tegishli petitsiya “Mening fikrim” jamoaviy murojaatlar portalida e’lon qilindi.
Qayd etilishicha, kundalik hayotda uchraydigan muammolardan biri bu – valyuta ayirboshlash vaqtida banklarda navbat kutish. Soat 16:00 dan keyin bankka kirishning imkoni yo‘q, chunki ish vaqti mijozlar uchun soat 16:00 gacha qilib belgilangan. Dam olish kunlarida esa valyuta ayirboshlashning umuman iloji yo‘q, chunki banklar ishlamaydi.
“Pandemiya davrida bu holat yanada qiyin kechmoqda. Misol tariqasida boshqa rivojlangan davlatlarni olaylik. Ularda yuridik shaxslarga valyuta ayirboshlash shoxobchalarini ochish va faoliyat yuritishga ruxsat etilgan. Ishlash vaqti ham chegaralanmagan. Nima uchun bizda aholiga shunday qulayliklar yaratishning imkoni yo‘q?” – deb yozadi murojaat muallifi.
Aholiga yanada qulayliklar yaratish maqsadida yuridik va jismoniy shaxslarga valyuta ayirboshlash faoliyatini amalga oshirishga ruxsat berish va bu holatni amaldagi qonunchilikda mustahkamlash taklif qilingan.
Avvalroq Xalqaro valyuta jamg‘armasi O‘zbekistonga bank va kompaniyalarni isloh qilishni kechiktirmaslik bo‘yicha tavsiya bergandi.
Izoh (0)