Sirdaryo viloyati hokimi G‘ofurjon Mirzayevning fikricha, Toshkent shahrining kengayishi hisobga olinsa, poytaxtning kelajagi Sirdaryo viloyatida. Viloyat hokimi bu fikrni 14-oktabr kuni bo‘lib o‘tgan Xalqaro press-klub sessiyasida bildirdi, deb yozmoqda “Gazeta.uz”.

Foto: “Daryo”

Hokimning so‘zlariga ko‘ra, geografik joylashuv va logistika masalasi bo‘yicha Sirdaryo viloyati katta zavod va fabrikalar uchun eng qulay joy hisoblanadi.

“Toshkentliklar xafa bo‘lmasin. Toshkentning kelajagi Sirdaryo deganman. Sababi eng qulay yo‘lda joylashganmiz. Toshkentda baribir shahar kengayadi, ertaga u yerdan zavod-fabrikalarni, ekologik tomondan ham, Toshkent shahridan ko‘chirishga to‘g‘ri keladi. Qayerga keladi shular? Albatta, uzoqroq hududga keladi”, — dedi hokim.

Shuningdek, viloyat rahbaridan uning Sirdaryo viloyati ikkinchi Amerika bo‘lishi haqidagi gaplarini izohlash so‘raldi. 2019-yilning avgustda, I Xalqaro investitsiya forumi doirasida jurnalistlar bilan muloqotda G‘ofurjon Mirzayev Sirdaryo cho‘llarini obod qilish maqsadida vodiy, Jizzax, Samarqand, Buxoro va O‘zbekistonning deyarli barcha hududlaridan aholi vakillari kelganini aytgandi.

“Shuning uchun ko‘pchilik menga ushbu viloyatda ishlash qiyin bo‘ladi, deb aytgandi. Men ularga, demak, biz ikkinchi Amerika bo‘lar ekanmiz-da, deb aytganman. Sababi Amerika ham turli mintaqalardan kelganlar jamoasidan tashkil topgan”, — degan edi Mirzayev forumdagi nutqida.

G‘ofurjon Mirzayevning aytishicha, ko‘pchilik uning bu gaplarini to‘g‘ri tushunmagan va u bundan xafa bo‘lmagan.

“Qayerda raqobat bo‘lsa, qayerda kurash bo‘lsa, qayerda tortishuv bo‘lsa, o‘sha yerda o‘sish bo‘ladi. Bundan qo‘rqmasligimiz kerak”, — deya ta’kidladi hokim.

Davlat statistika qo‘mitasi ma’lumotlariga ko‘ra, 2020-yil yanvar—iyun oylarida Sirdaryo viloyatining hududiy yalpi ichki mahsuloti 4,8 trillion so‘mni tashkil etgan, bu mamlakat viloyatlari orasidagi eng past ko‘rsatkich hisoblanadi. Viloyat O‘zbekiston YaIMning shakllanishida eng kichik ulushga ega (1,9 foiz).

Eslatib o‘tamiz, Prezident Shavkat Mirziyoyev Sardoba suv ombori to‘g‘oni yorilganidan buyon o‘tgan davrda amalga oshirilgan bunyodkorlik ishlari bilan tanishish maqsadida 13-oktabr kuni Sirdaryo viloyatiga bordi. Prezident dastlab Mirzaobod tumanidagi “Yangi O‘zbekiston” deb qayta nomlangan “Haqiqat” mahallasida qurilgan yangi uylarni borib ko‘rdi.

Shundan so‘ng davlat rahbari safari davomida Oqoltin tumanida suv toshqinidan zarar ko‘rgan paxta dalasida bo‘lib, hosilni ko‘zdan kechirdi. Shuningdek, Prezident Oqoltin tumani aholisi bilan suhbatlashdi.

Keyin esa Shavkat Mirziyoyev Sardoba tumanidagi yangi qurilgan “Sardoba Oqsaroy tekstil” korxonasi faoliyati bilan tanishdi, tumanning “Do‘stlik” mahallasida qurilgan yangi uylarga tashrif buyurdi.

Shuningdek, davlat rahbari suv toshqinidan jabrlangan odamlar bilan uchrashdi.