“Tolibon” harakati AQShning amaldagi prezidenti Donald Tramp saylovlarda g‘alaba qozonishining tarafdori ekanini bildirdi. Bu haqda harakat rasmiy vakili Zabixulla Mujohid CBS News telekanaliga bergan intervyusida ma’lum qilgan.
Tashkilotning boshqa bir vakili esa telekanal orqali qilgan chiqishida “Trampning harakatlari butun dunyo uchun kulguli tuyulishi mumkinligi, biroq “Tolibon” harakati uning sog‘lom fikrli va mard inson ekaniga ishonishini” aytgan.
Shuningdek, tashkilot vakillari Trampning koronavirusga chalingani harakat a’zolarida xavotir paydo qilganini qayd etgan.
“Trampning COVID-19’ga chalinganini bilganimizda uning ahvolidan xavotirlandik, lekin hammasi yaxshi tomonga o‘zgarayotganga o‘xshaydi”, — degan telekanal orqali efirga berilgan lavhada “Tolibon” yetakchilarining yana biri.
Tramp shtabining rasmiy vakili Tim Merto “Tolibon”ning qo‘llab-quvvatlashi haqidagi xabarlarga munosabat bildirib, Donald Tramp avvalo AQSh manfaatlarini har tomonlama himoya qilishga intilishini bildirgan.
Shu haftada Tramp Twitter’dagi sahifasida Afg‘onistonda qolayotgan amerikalik ayol va erkaklarning muayyan qismi Rojdestvogacha (25-dekabr) uyga qaytishi haqida qayd yozib qoldirgan. Avval AQShning Afg‘onistonda 4 mingga yaqin harbiylarni qoldirmoqchi ekani aytilgan, biroq mamlakat prezidentining milliy xavfsizlik masalalari bo‘yicha maslahatchisi Robert O’Brayen 7-oktabrda kelasi yil boshida Afg‘onistondagi harbiylar soni 2,5 ming kishigacha kamayishini ma’lum qilgan.
2020-yil fevrali oxirida AQSh hamda “Tolibon” 19 yillik urushga barham berib, tinchlik kelishuvi imzolagan. Shartnomada AQSh va NATO Afg‘onistondagi qo‘shinlarini 14 oy davomida mamlakatdan olib chiqib ketishi ko‘zda tutilgan. Bundan tashqari “Tolibon” a’zolari Vashington hamda BMTning sanksiyalari ro‘yxatidan chiqariladi. Shuningdek, AQSh Afg‘onistonning ichki siyosatiga aralashmasligi ham ushbu kelishuvda belgilab qo‘yilgan.
“Tolibon” vakillari esa Afg‘oniston hududini hujum nuqtalariga aylanitrmasligi zarur. Kobul tashkilotning 5 ming nafar a’zosini hibsdan ozod qilishi, qarama-qarshi yo‘nalishda esa mingga yaqin xavfsizlik kuchlarining vakili harakat a’zolari tomonidan ozodlikka chiqarilishi kerak.
Izoh (0)