«Толибон» ҳаракати АҚШнинг амалдаги президенти Дональд Трамп сайловларда ғалаба қозонишининг тарафдори эканини билдирди. Бу ҳақда ҳаракат расмий вакили Забихулла Мужоҳид CBS News телеканалига берган интервьюсида маълум қилган.
«Биз унинг сайловларда ғалаба қозониши ва Афғонистондан АҚШ ҳарбийларининг олиб чиқиб кетилишига эришишига умид қилаяпмиз», — деган у.
Ташкилотнинг бошқа бир вакили эса телеканал орқали қилган чиқишида «Трампнинг ҳаракатлари бутун дунё учун кулгули туюлиши мумкинлиги, бироқ «Толибон» ҳаракати унинг соғлом фикрли ва мард инсон эканига ишонишини» айтган.
Шунингдек, ташкилот вакиллари Трампнинг коронавирусга чалингани ҳаракат аъзоларида хавотир пайдо қилганини қайд этган.
«Трампнинг COVID-19’га чалинганини билганимизда унинг аҳволидан хавотирландик, лекин ҳаммаси яхши томонга ўзгараётганга ўхшайди», — деган телеканал орқали эфирга берилган лавҳада «Толибон» етакчиларининг яна бири.
Трамп штабининг расмий вакили Тим Мерто «Толибон»нинг қўллаб-қувватлаши ҳақидаги хабарларга муносабат билдириб, Дональд Трамп аввало АҚШ манфаатларини ҳар томонлама ҳимоя қилишга интилишини билдирган.
Шу ҳафтада Трамп Twitter’даги саҳифасида Афғонистонда қолаётган америкалик аёл ва эркакларнинг муайян қисми Рождествогача (25 декабрь) уйга қайтиши ҳақида қайд ёзиб қолдирган. Аввал АҚШнинг Афғонистонда 4 мингга яқин ҳарбийларни қолдирмоқчи экани айтилган, бироқ мамлакат президентининг миллий хавфсизлик масалалари бўйича маслаҳатчиси Роберт O’Брайен 7 октябрда келаси йил бошида Афғонистондаги ҳарбийлар сони 2,5 минг кишигача камайишини маълум қилган.
2020 йил феврали охирида АҚШ ҳамда «Толибон» 19 йиллик урушга барҳам бериб, тинчлик келишуви имзолаган. Шартномада АҚШ ва НАТО Афғонистондаги қўшинларини 14 ой давомида мамлакатдан олиб чиқиб кетиши кўзда тутилган. Бундан ташқари «Толибон» аъзолари Вашингтон ҳамда БМТнинг санкциялари рўйхатидан чиқарилади. Шунингдек, АҚШ Афғонистоннинг ички сиёсатига аралашмаслиги ҳам ушбу келишувда белгилаб қўйилган.
«Толибон» вакиллари эса Афғонистон ҳудудини ҳужум нуқталарига айланитрмаслиги зарур. Кобул ташкилотнинг 5 минг нафар аъзосини ҳибсдан озод қилиши, қарама-қарши йўналишда эса мингга яқин хавфсизлик кучларининг вакили ҳаракат аъзолари томонидан озодликка чиқарилиши керак.
Изоҳ (0)