Hindistonda 11-oktabr holatiga ko‘ra bir sutka ichida koronavirusga chalinish bo‘yicha 74,3 mingta yangi holat qayd etildi va mamlakatda COVID-19 koronavirus infeksiyasini yuqtirib olganlar soni 7,05 millionga yetdi. Bu haqda Hindiston sog‘liqni saqlash vazirligi axborotiga tayanib “RIA Novosti” xabar berdi.
Hindiston butun dunyoda koronavirusga chalinganlar soni bo‘yicha AQShdan keyin ikkinchi o‘rinda bormoqda. AQShda 7,7 million nafar odamda COVID-19 infeksiyasi borligi aniqlangan.
Hindiston SSVning qayd etishicha, bir sutka ichida 1 millionta test o‘tkazilgan va 89 ming nafar kishining kasallikni yenggani aniqlаngan. Koronavirusdan sog‘ayganlarning umumiy soni 6 million nafardan oshgan.
Mamlakatda Hindiston tibbiy tadqiqotlar kengashi tomonidan o‘tkazilgan boshqa bir serologik tadqiqot natijalariga ko‘ra virusning tarqalish hajmi yana ham kengroq bo‘lishi mumkin. Tadqiqot bo‘yicha aholisining soni 1,3 milliarddan oshgan Hindistonda 18 yosh va undan katta hindistonliklarning 7,1 foizi koronavirusga chalingan. Tadqiqot 17-avgustdan 22-sentabrgacha bo‘lgan oraliqda o‘tkazilib, unda 29 ming nafar kishi ishtirok etgan.
Avval dunyoda koronavirusga chalinishlar soni bo‘yicha kunlik antirekord ketma-ket uchinchi kun yangilangani, jahonda COVID-19’ga chalinganlar soni 37 milliondan oshgani haqida xabarlar berilgan. 8-oktabrda koronavirus infeksiyasini yuqtirib olganlar soni butun dunyoda 36 million nafardan oshgan.
Eslatib o‘tamiz, Jahon sog‘liqni saqlash tashkiloti 2020-yil 11-mart kuni yer yuzida COVID-19 koronavirus infeksiyasining tarqalishi pandemiya darajasiga chiqqanini e’lon qilgan.
Izoh (0)