“Vechernaya Moskva” Xitoyda yashovchi rossiyaliklardan mamlakat koronavirusning ikkinchi to‘lqini boshlanmasligini ta’minlash uchun qanday tizim asosida ishlar tashkil qilingani va fuqarolar qanday ehtiyot choralarini qo‘llagani haqida ma’lumotlar oldi.
“Xitoyda hayot allaqachon avvalgi me’yoriy ritmga qaytgan. Gonkongda vaqti-vaqti bilan kasallanish holatlari kuzatiladi, lekin shov-shuvli xabarlar tez fursatlarda jimib qoladi. Xitoyliklarda bu borada o‘ziga xos tizim ishlab chiqilgan, resurslar hammaga yetadi”, — degan Guanchjouda yashovchi Aleksandr ismli kishi.
Uning so‘zlariga ko‘ra hukumat fuqarolardan hotirjamlikka berilmaslik va xavfsizlik talablariga rioya qilishni so‘raydi. Bundan tashqari, kasallikning lokal tarzda tarqalishiga mamlakat rahbariyati tomonidan tezkor tarzda munosabat bildiriladi.
“Masalan, iyunda Pekinda kasallik tarqalishi keskin oshdi, lekin infeksiya o‘chog‘i tezkorlik bilan kuchsizlantirildi. Ushbu ishlarga ikki hafta sarf etildi. Bunda poytaxt shaharni yopishga ham to‘g‘ri kelgani yo‘q”, — deya qo‘shimcha qilgan u.
Shanxayda yashovchi Andrey Xitoyda ayrim cheklov choralari hanuzgacha saqlab qolinganini bildirgan. Uning aytishicha, mamlakatda xorijdan kelganlarning hammasi 14 kunlik majburiy karantinni o‘taydi. Shuningdek, bir qator tashkilotlarda xodimlar va tashrif buyuruvchilarning tana harorati o‘lchanadi, gohida shaxsga doir hujjatlarni ko‘rsatish ham talab etiladi.
“Har bir mahalliy aholi vakilida smartfonida maxsus dastur ishlab turadi. Ilova sog‘liq kodini hisob-kitob qiladi. Dastur telefon egasining hudud bo‘ylab harakatlanishini kuzatadi. Agar mobil qurilma egasi kasallanish ko‘rsatkichi yuqori bo‘lmagan hududlarga bormagan bo‘sa, unga yashil kod beriladi, aks holda esa — qizil rangli belgi bilan yurishga majbur”, — deydi Andrey.
Mavzuga doir: Xitoyda Rossiyadan keltirilgan muzlatilgan dengiz mahsulotlari qadog‘idan koronavirus topildi
Karantinga rioya qilish Xitoyda qat’iy nazorat qilinadi. Masalan, qoidabuzar qo‘liga maxsus tasma taqilishi va xonadoni eshigi oldiga kamera o‘rnatilishi mumkin.
Oxirgi bir sutka davomida 11-oktabr holatiga ko‘ra Xitoyda COVID-19’ga chalinish bo‘yicha 26 ta yangi holat kuzatilgan. Mamlakatda 2020-yil boshidan beri 91 ming nafar odam koronavirus infeksiyasiga chalingan.
Mavzuga doir: Xitoyda COVID-19’ga qarshi ommaviy emlash boshlandi
Izoh (0)