O‘zbekiston bosh vazir o‘rinbosari Shuhrat G‘aniyev koronavirusga chalingani aytilmoqda. Bu haqda “Jahon.uz” nashriga tayanib,“Xabar.uz” xabar berdi.
Nashrlarning xabariga ko‘ra, Shuhrat G‘aniyev Toshkent shahridagi 16-shifoxonada davolanmoqda. Uning ahvoli yaxshi ekani, kasallik yengil kechayotgani ma’lum qilingan.
Shuhrat G‘aniyev bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimga tayinlanganidan keyin ilk bor 2-oktabr kuni Prezident Shavkat Mirziyoyevning Nukus shahridagi “Qoraqalpoq baliq sanoat” MChJ faoliyati bilan tanishuvi jarayonida ko‘rinish bergandi.
Eslatib o‘tamiz, Shuhrat G‘aniyevdan avval bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimida ishlagan O‘ktam Barnoyev sentabr oyida koronavirus asoratlari oqibatida vafot etgandi.
Shuningdek, Shuhrat G‘aniyevning akasi, Farg‘ona viloyati Marg‘ilon shahar tibbiyot birlashmasi boshlig‘i Avazbek G‘aniyev pnevmoniya xastaligi va yuqumsiz bo‘lgan boshqa hamroh kasalliklar oqibatida 15-sentabr kuni vafot etgandi.
Izoh (0)